Xəzər dənizi sahilboyu ərazilərdə keçirilən növbəti profilaktik tədbirlər zamanı 30 nəfərin tullantıları müəyyən olunmuş yerlərdən kənara atdığı aşkar edilib.

Daxili İşlər Nazirliyindən Sumqayit.tv-yə verilən məlumata görə, tədbirlər zamanı bir neçə nəfərin məişət tullantılarını zibil konteynerlərindən kənara atdığı, texniki və tullantı sularını isə təyinatdan kənar ərazilərə axıtdığı müəyyən olunub.

Polis əməkdaşları tərəfindən həmin şəxslər barəsində inzibati qaydada tədbir görülüb. Həmin şəxslər müvafiq qanunvericiliyə uyğun olaraq cərimələnib.

Qeyd edək ki, ekoloji sabitliyin qorunması məqsədilə müvafiq dövlət qurumları ilə birgə həyata keçirilən nəzarət tədbirləri Bakı və Sumqayıtla yanaşı, Xaçmaz və Lənkəran rayonlarını da əhatə edib.

Hazırda sahilboyu ərazilərdə ekoloji təhlükəsizliyin təmin olunması istiqamətində monitorinqlər və maarifləndirmə tədbirləri davam etdirilir.