Sumqayıt şəhərində bir ailənin dörd üzvü dəm qazından zəhərlənib.

Sumqayit.tv xəbər verir ki, hadisə şəhərin Xəzər bağları ərazisində yerləşən fərdi yaşayış evində baş verib. Dəm qazından zəhərlənmə şübhəsi ilə 1979-cu il təvəllüdlü Emin Məhəmməd oğlu Əliyev, 1990-cı il təvəllüdlü Günel Səməndər qızı Əliyeva, 2009-cu il təvəllüdlü Məhəmməd Emin oğlu Əliyev və 2012-ci il təvəllüdlü Mədinə Emin qızı Əliyeva tibbi yardım üçün xəstəxanaya yerləşdiriliblər.

Sumqayıt Tibb Mərkəzindən “Report”un yerli bürosunun sorğusuna cavab olaraq bildirilib ki, bu gün saat 02:40 radələrində dəm qazından zəhərlənmə şübhəsi ilə 2-si yeniyetmə olmaqla 4 nəfər Sumqayıt Tibb Mərkəzinin Təcili Tibbi Yardım Xəstəxanasına və Uşaq Xəstəxanasına hospitalizasiya olunub.

Zərərçəkənlərə dəm qazının toksiki təsiri diaqnozu təyin edilib və onlara zəruri tibbi yardım göstərilib. Tibbi müdaxilədən sonra vəziyyətləri qənaətbəxş qiymətləndirilən şəxslərin hər biri ambulator müalicə üçün evə buraxılıb.

Hazırda hadisənin başvermə səbəbləri ilə bağlı aidiyyəti qurumlar tərəfindən araşdırma aparılır.

22-01-2026, 10:34 7