Vətəndaşlar üçün rəqəmsal xidmətlərin əlçatanlığını artırmaq məqsədilə "mygov" platformasında daha iki yeni xidmət istifadəyə verilib.

Sumqayit.tv xəbər verir ki, Ədliyyə Nazirliyinin təqdim etdiyi "Vəkilə verilən etibarnamənin təsdiq edilməsi" və "Bank xidmətlərindən istifadə edilməsi ilə bağlı etibarnamənin verilməsi" xidmətləri artıq həm my.gov.az portalı, həm də "mygov" mobil tətbiqi üzərindən vətəndaşların istifadəsinə açıqdır.

Yeni xidmətlər vasitəsilə vətəndaşlar digər şəxslərə öz adlarından bank əməliyyatlarını həyata keçirmək, eləcə də vəkilə hüquqi məsələlərin həlli, məhkəmədə təmsilçilik və digər hüquqi prosedurlar üçün etibarnamə verə biləcəklər.

Xidmətlərdən istifadə etmək üçün vətəndaşlar "mygov" tətbiqində "Xidmətlər" bölməsinə daxil olaraq müvafiq kateqoriyanı seçməli, tələb olunan məlumatları doldurmalı və etibarnaməni rəsmiləşdirməlidirlər.

Bundan əlavə, istifadəçilər müraciətlərinin icra vəziyyətini "Müraciət tarixçəsi" bölməsindən izləyə, sənəd hazır olduqdan sonra isə elektron şəkildə əldə edə bilərlər.

Qeyd edək ki, bundan əvvəl də Ədliyyə Nazirliyinin notariat, icra işləri və digər hüquqi xidmətləri mərhələli şəkildə "mygov" platformasına inteqrasiya olunub. Bu yenilik isə vətəndaşların hüquqi və bank xidmətlərindən daha rahat və operativ istifadə etməsinə imkan yaradacaq.

Bu gün, 17:08 10