Sumqayıt Dövlət Universiteti (SDU) ilə SOCAR Polymer MMC arasında əməkdaşlığın genişləndirilməsi istiqamətində mühüm görüş keçirilib.

Sumqayit.tv xəbər verir ki, universitetin rektoru, professor Nurəli Yusifbəyli ilə SOCAR Polymer MMC-nin baş direktoru Fuad Əhmədov arasında baş tutan görüşdə ali təhsil ilə sənaye arasında əlaqələrin gücləndirilməsi, innovasiya yönümlü tərəfdaşlıq, tələbələrin istehsalat təcrübəsinin artırılması və birgə elmi-tədqiqat layihələrinin həyata keçirilməsi müzakirə olunub.

Rektor Nurəli Yusifbəyli bildirib ki, SDU-nun ölkənin əsas sənaye mərkəzlərindən biri olan Sumqayıtda yerləşməsi təhsil, elm və istehsalatın inteqrasiyası üçün geniş imkanlar yaradır. Onun sözlərinə görə, nəzəri biliklərin praktik bacarıqlarla tamamlanması əmək bazarının tələblərinə cavab verən peşəkar kadrların hazırlanmasında mühüm rol oynayır.

Görüşdə qeyd olunub ki, yeni tədris ilindən etibarən SDU ilə SOCAR Polymer arasında əməkdaşlığın daha da genişləndirilməsi planlaşdırılır. Prioritet istiqamətlərə tədris proqramlarının əmək bazarının tələblərinə uyğunlaşdırılması, tələbələrin istehsalat təcrübəsinin artırılması, yuxarı kurs tələbələrinin dərslərinin bir hissəsinin müəssisədə təşkili, eləcə də birgə innovasiya layihələrinin həyata keçirilməsi daxildir.

Tərəflər, həmçinin Polimer Materialları İnstitutunun elmi-tədqiqat fəaliyyətinin sənaye ilə inteqrasiyası məsələsini də müzakirə ediblər. Bildirilib ki, yüksək möhkəmliyə, aşağı yanma sürətinə və ekoloji təhlükəsizlik göstəricilərinə malik nanokompozit materiallarla bağlı layihələrin SOCAR Polymer-ə təqdim edilməsi nəzərdə tutulur.

SOCAR Polymer-in baş direktoru Fuad Əhmədov isə ali təhsil müəssisələri ilə əməkdaşlığın strateji əhəmiyyət daşıdığını vurğulayaraq, tədris, istehsalat təcrübəsi və tətbiqi elmi-tədqiqat sahələrində SDU ilə əməkdaşlığın genişləndirilməsinə dəstək verməyə hazır olduqlarını bildirib.

Bu gün, 12:44 24