Dövlət İmtahan Mərkəzinin keçirdiyi qəbul imtahanlarında yüksək nəticə göstərən Sumqayıt şəhər 35 nömrəli tam orta məktəbin məzunu Zamin Kərimov uğurunun sirrindən danışıb.

Sumqayit.tv Sumqayit24.az-a istinadən xəbər verir ki, Zamin Kərimov topladığı yüksək baldan məmnun olduğunu bildirsə də, bu qədər yüksək nəticə əldə edəcəyini gözləmədiyini deyib.

O, uğurunun əsas səbəbləri kimi planlı çalışmağı, özünə inamı və duaları göstərib:

"Planlı və keyfiyyətli çalışmaq, özünə inanmaq və dua etmək mənim üçün əsas amillər idi. Telefondan normal şəkildə istifadə etmişəm və bunun təhsilimə heç bir mənfi təsiri olmayıb".

Gələcək təhsil planlarından danışan Zamin maliyyə sahəsində ixtisaslaşmaq istədiyini bildirib.

"Maliyyə ixtisasını seçmək istəyirəm. Universitet seçimim hələ dəqiq deyil, amma hazırda fikrimdə BANM və ADA Universiteti var".

Qeyd edək ki, Zamin Kərimov II ixtisas qrupu üzrə hər iki mərhələnin nəticələrinə əsasən 690 bal toplayaraq ölkə üzrə ən yüksək nəticəni göstərən abituriyent olub. Bu uğur Sumqayıt təhsilinin növbəti nailiyyətlərindən biri kimi qiymətləndirilir.