Azərbaycan, Gürcüstan və Türkiyə arasında hərbi əməkdaşlıq çərçivəsində ölkəmizdə keçiriləcək "Eternity-2026" kompüter dəstəkli komanda-qərargah təliminin əsas planlaşdırma konfransı təşkil olunub.

Sumqayit.tv xəbər verir ki, bu barədə Müdafiə Nazirliyi məlumat yayıb.

Məlumata görə, cari ilin noyabr ayında keçiriləcək təlimdə üç ölkənin hərbi qulluqçuları ilə yanaşı, Azərbaycanın Strateji Obyektlərin Mühafizəsi Dövlət Agentliyinin və Azərbaycan Dəmir Yollarının əməkdaşları da iştirak edəcəklər.

Bildirilib ki, təlimin ssenarisi iştirakçı ölkələrin ərazilərindən keçən strateji obyektlərin və kommunikasiya xətlərinin taktiki səviyyədə mühafizə və müdafiəsinin təşkili üzərində qurulub.

Konfrans zamanı təlimin məqsədləri, mövzusu, birgə qərargahın tərkibi, icra olunacaq taktiki epizodlar və digər təşkilati məsələlər ətrafında müzakirələr aparılıb.

Qeyd edək ki, "Eternity" təlimləri Azərbaycan, Türkiyə və Gürcüstan arasında hərbi əməkdaşlığın gücləndirilməsi, həmçinin regionda strateji infrastrukturun təhlükəsizliyinin təmin olunması məqsədilə mütəmadi olaraq keçirilir.

16-07-2026, 16:37 57