Şamaxıda qayınatasını qətlə yetirməkdə təqsirləndirilən şəxsə hökm oxunub.

Sumqayit.tv Oxu.az-a istinadən xəbər verir ki, Sumqayıt Ağır Cinayətlər Məhkəməsinin hökmü ilə qəsdən adam öldürməkdə təqsirləndirilən Teymur Əliyev 9 il müddətinə azadlıqdan məhrum edilib.

İttihama əsasən, hadisə ötən il Şamaxı şəhərində baş verib. Bildirilir ki, Teymur Əliyev 2019-cu ildə ailə həyatı qurub və onların üç övladı dünyaya gəlib. 2024-cü ildə çalışdığı polis orqanlarından işdən azad olunduqdan sonra ailədə problemlər yaranıb. Daha sonra həyat yoldaşı uşaqları ilə birlikdə ata evinə qayıdıb.

Məlumata görə, qayınatası Elşən Quliyev kürəkənindən qızından boşanmasını tələb edib və tərəflər arasında münasibətlər gərginləşib.

Hadisə günü Teymur Əliyev azyaşlı övladını qucağına götürdükdən sonra tərəflər arasında yenidən mübahisə yaranıb. İstintaq materiallarına əsasən, o, evdən götürdüyü bıçaqla qayınatasına iki zərbə endirib. Aldığı xəsarətlərdən Elşən Quliyev hadisə yerində həyatını itirib.

Hadisədən sonra Teymur Əliyev könüllü şəkildə polisə təslim olub.

Sumqayıt Ağır Cinayətlər Məhkəməsinin hökmü ilə o, 9 il müddətinə azadlıqdan məhrum edilib.

14-07-2026, 13:16 53