Sumqayıt Apellyasiya Məhkəməsində özbaşınalıqda təqsirləndirilən Amil Həsənovun (adı, soyadı şərtidir) barəsində bəraət hökmündən verilən apellyasiya şikayətinə baxılıb.

Sumqayit.tv xəbər verir ki, hakim Elçin Məmmədovun sədrliyi ilə keçirilən iclasda qərar elan olunub. Qərara əsasən, apellyasiya şikayəti təmin edilməyib və bəraət hökmü qüvvədə saxlanılıb.

İttihama görə, hadisə 2022-ci ilin yay aylarında Xırdalan şəhərinin Quşçuluq yaşayış massivində baş verib. Amil Həsənov evinin arxa hissəsində tikinti işləri apararkən tikili ilə qonşu ərazi arasında nəzərdə tutulan ara məsafəsinin tələblərini pozub.

İstintaqın məlumatına görə, aparılan tikinti nəticəsində qonşunun fərdi yaşayış evinin divarlarında çatlar yaranıb və 5 382 manat məbləğində ziyan dəydiyi bildirilib.

Abşeron Rayon Məhkəməsi Həsənovun əməlində cinayət tərkibi olmadığı qənaətinə gələrək ona bəraət verib.

Zərərçəkmiş tərəfin nümayəndəsi həmin qərardan apellyasiya şikayəti versə də, Sumqayıt Apellyasiya Məhkəməsi şikayəti təmin etməyib.

Qeyd edək ki, Amil Həsənov “Azərbaycan Xəzər Dəniz Gəmiçiliyi” QSC-də mexaniki təmir bölməsinin gəmi boru çəkəni vəzifəsində çalışır.//Pravda.az

Bu gün, 12:55 6