Bakı Dövlət Universitetində (BDU) hüquqşünaslıq ixtisası üzrə təkrar ali təhsil imtahanında iştirak edən bir qrup namizəd imtahanın təşkili, sualların məzmunu və yaradılan şəraitlə bağlı narazılıqlarını bildiriblər.

Namizədlərin Sumqayıt.tv-yə göndərdiyi müraciətdə qeyd olunur ki, 24 avqust 2026-cı il tarixində keçirilən imtahan obyektiv və ədalətli təşkil edilməyib.

İddialara görə, imtahanda təqdim olunan sualların bir hissəsi təsdiq edilmiş proqramla uyğunluq təşkil etməyib, xüsusilə tarix fənni üzrə bəzi sualların mənbəyi məlum olmayıb. Namizədlər sualların həddindən artıq mürəkkəb olduğunu və biliklərin obyektiv qiymətləndirilməsinə imkan vermədiyini bildirirlər.

Müraciətdə ən ciddi narazılıqlardan birinin də imtahana ayrılan 2 saatlıq müddətlə bağlı olduğu qeyd edilir. Namizədlərin sözlərinə görə, 100 sualın cavablandırılması, xüsusilə mürəkkəb və həcmi böyük suallar nəzərə alındıqda, iki saat ərzində mümkün olmayıb. Onlar bildirirlər ki, imtahanın müddəti barədə əvvəlcədən kifayət qədər məlumat verilməyib və bu barədə yalnız imtahan günü məlumat əldə ediblər.

Namizədlər həmçinin imtahan keçirilən auditoriyalarda havalandırma probleminin olduğunu, yüksək temperaturun hökm sürdüyünü və yaxınlıqdakı binada aparılan təmir-tikinti işlərindən gələn səslərin imtahan prosesinə mane olduğunu iddia edirlər.

Müraciətdə nəzarətçilərin davranışından da narazılıq ifadə olunub. Bildirilir ki, yaranmış vəziyyət imtahan zamanı nəzarətçilərə şifahi şəkildə çatdırılsa da, bununla bağlı operativ tədbir görülməyib.

“Proqram yalnız iki ay əvvəl təqdim olunub”

Namizədlərin sözlərinə görə, imtahan proqramı onlara yalnız iyun ayının əvvəlində, yəni imtahana təxminən iki ay qalmış təqdim edilib.

Onlar proqramda çoxsaylı kitab və mövzuların yer aldığını, belə qısa müddətdə bütün materialların tam mənimsənilməsinin çətin olduğunu bildirirlər. Həmçinin imtahanda düşən suallarla təqdim edilmiş proqram arasında ciddi uyğunsuzluqların olduğunu iddia edirlər.

Namizədlər qeyd edirlər ki, sual kitabçaları imtahandan sonra onların əlində saxlanılmadığından konkret suallar üzrə yazılı nümunələr təqdim etmək imkanları məhduddur.

“Rəsmi qaydada müraciət etmişik”

Müraciətdə qeyd olunur ki, yaranmış problemlərlə bağlı həm Bakı Dövlət Universitetinin rəhbərliyinə, həm də Elm və Təhsil Nazirliyinə rəsmi şikayətlər göndərilib.

Namizədlər universitet rəhbərliyi tərəfindən məsələyə obyektiv yanaşılmadığını, müraciətlərinə cavab verilmədiyini bildirirlər. Onların sözlərinə görə, şikayətlə bağlı quruma dəvət olunsalar da, görüş zamanı məsələnin mahiyyəti üzrə araşdırma aparılmayıb.

Narazılıq neçə namizədi əhatə edir?

Namizədlərin iddiasına görə, yaranmış vəziyyətdən imtahanda iştirak edənlərin təxminən 70-80 faizi narazıdır.

Bildirilib ki, birgə hazırlıq keçən qrup üzrə təxminən 60 namizəd imtahanın nəticələri və təşkilati məsələlərlə bağlı narazılığını ifadə edib. Hazırda kollektiv müraciət təqdim edilməsə də, namizədlərin fərdi qaydada aidiyyəti qurumlara müraciətlər ünvanladığı qeyd olunur.

Namizədlərin tələbi

Namizədlər aidiyyəti qurumlardan imtahan suallarının və nəticələrin qanunvericiliyə uyğun şəkildə araşdırılmasını istəyirlər.

Onlar həmçinin sualların çətinliyi, imtahan müddətinin məhdudluğu və yaradılan şərait nəzərə alınaraq keçid balının aşağı salınmasını xahiş edirlər.

Namizədlər bildirirlər ki, məqsədləri ölkə daxilində təhsil almaqdır və belə halların yerli təhsil sisteminə olan inama mənfi təsir göstərməməsi üçün məsələyə obyektiv yanaşılmasını gözləyirlər.

Sumqayıt.tv məsələ ilə bağlı Bakı Dövlət Universitetinin və Elm və Təhsil Nazirliyinin mövqeyini dərc etməyə hazırdır.

Bu gün, 13:44 56