Azərbaycanda məktəblərin rəqəmsal infrastrukturunun gücləndirilməsi istiqamətində görülən işlər nəticəsində minlərlə təhsil müəssisəsi genişzolaqlı internetlə təmin olunub.
Sumqayit.tv xəbər verir ki, Təhsil Sisteminin İnformasiyalaşdırılması İdarəsinin rəisi Vüsal Xanlarovun sözlərinə görə, hazırda ölkə üzrə məktəblərin 63 faizi genişzolaqlı internet şəbəkəsinə qoşulub.
O bildirib ki, internet bağlantısı olmayan məktəb yoxdur və rəqəmsallaşmanın əsas məqsədi bütün şagirdlər üçün bərabər təhsil imkanlarının yaradılmasıdır.
Rəqəmlərə görə, hazırda 2 857 məktəb genişzolaqlı internetlə təmin edilib. Bu isə şagirdlərin 82 faizinin yüksək sürətli internet imkanlarından yararlanmasına şərait yaradır.
Müqayisə üçün qeyd edək ki, 2020-ci ildə genişzolaqlı internetlə əhatə olunan məktəblərin sayı cəmi 171 idi. Son illərdə bu sahədə əldə olunan nəticələr təhsil müəssisələrinin rəqəmsal transformasiyasının sürətləndiyini göstərir.
Bundan əlavə, məktəblərin texniki bazasının gücləndirilməsi məqsədilə ümumilikdə 236 min 295 kompüterin təhsil müəssisələrinə verilməsi nəzərdə tutulur.
Təhsil rəsmisi vurğulayıb ki, rəqəmsallaşma prosesi şagirdlərin müasir bilik və bacarıqlara yiyələnməsinə, həmçinin ölkənin bütün bölgələrində keyfiyyətli təhsilə çıxış imkanlarının artırılmasına xidmət edir.
15-07-2026, 18:20
57
