Sumqayıtın Stansiya Sumqayıt ərazisində yerləşən şəhid Kənan Allahverdiyev adına küçədə antisanitar vəziyyət sakinlərin narazılığına səbəb olub.

Sumqayit.tv-yə daxil olan video və sakinlərin müraciətinə əsasən, ərazidə məişət tullantıları təxminən bir həftədir daşınmır.

Sakinlərin sözlərinə görə, zibil konteynerləri yararsız vəziyyətə düşüb, tullantılar konteynerlərdən kənara daşaraq küçədə antisanitar vəziyyət yaradıb. Onlar bildirirlər ki, isti hava şəraitində əraziyə kəskin qoxu yayılır və bu, həm sakinlərin gündəlik həyatına, həm də ətraf mühitə mənfi təsir göstərir.

Vətəndaşlar qeyd edirlər ki, şəhid Kənan Allahverdiyevin adını daşıyan küçənin yol infrastrukturu da bərbad vəziyyətdədir. Onların fikrincə, həm natəmizlik, həm də yolun yararsız vəziyyətdə olması şəhidin adını daşıyan küçəyə yaraşmır.

Sakinlər aidiyyəti qurumlardan məişət tullantılarının vaxtında daşınmasını, yararsız konteynerlərin yenilənməsini və küçədə yaranmış problemlərin qısa müddətdə aradan qaldırılmasını xahiş edirlər.

Qeyd edək ki, Sumqayit.tv məsələ ilə bağlı aidiyyəti qurumun mövqeyini öyrənməyə və cavabını dərc etməyə hazırdır.

Bu gün, 20:00 7