2026 FIFA Dünya Çempionatında ikinci finalçının adına aydınlıq gəlib.
Sumqayit.tv xəbər verir ki, Argentina yarımfinalda İngiltərə üzərində 2:1 hesablı dramatik qələbə qazanaraq ardıcıl ikinci dəfə dünya çempionatının finalına vəsiqə əldə edib.
Atlanta şəhərində keçirilən qarşılaşmanın ilk hissəsində qapılara qol vurulmayıb. İngiltərə 55-ci dəqiqədə Entoni Qordonun qolu ilə hesabda önə keçsə də, argentinalılar geri dönüş etməyi bacarıblar. 85-ci dəqiqədə Enzo Fernandes uzaq məsafədən dəqiq zərbə ilə hesabı bərabərləşdirib. Əlavə vaxtda isə Lionel Messinin məhsuldar ötürməsini Lautaro Martines qola çevirərək komandasına final biletini qazandırıb.
Beləliklə, iyulun 19-da keçiriləcək həlledici oyunda Argentina İspaniya ilə qarşılaşacaq.
Final öncəsi diqqət mərkəzində olan məqamlardan biri də Lionel Messi ilə İspaniya millisinin gənc ulduzu Lamin Yamal arasında yaşanacaq simvolik qarşıdurmadır. Son günlər yenidən gündəmə gələn və sosial şəbəkələrdə geniş yayılan fotoda 2007-ci ildə xeyriyyə layihəsi çərçivəsində gənc Lionel Messinin körpə Lamin Yamalı çimizdirdiyi görünür. İllər sonra həmin körpə futbolçu dünya çempionatının finalında Messinin rəqibi olacaq.
39 yaşlı Lionel Messi yarımfinalda da həlledici rol oynayıb. Təcrübəli futbolçu qələbə qolunun ötürməsini verərək komandasının finala yüksəlməsində mühüm pay sahibi olub.
Beləliklə, iyulun 19-da ABŞ-nin Nyu-Cersi ştatının İst-Raterford şəhərində keçiriləcək final yalnız dünya çempionluğu uğrunda mübarizə deyil, həm də futbol tarixinin ən maraqlı və simvolik hekayələrindən birinə çevriləcək.
Bu gün, 17:07
8
