Şuşada iyulun 14-də Azərbaycan Prezidenti İlham Əliyevin Slovakiya Prezidenti Peter Pelleqrini ilə geniş tərkibdə görüşü keçirilib.

Sumqayit.tv xəbər verir ki, dövlət başçısı qonaqları salamlayaraq Slovakiya Prezidentini və onu müşayiət edən nümayəndə heyətini Qarabağda qəbul etməkdən məmnunluğunu ifadə edib.

Prezident İlham Əliyev ötən il Slovakiyaya rəsmi səfərini və həmin səfər çərçivəsində aparılan müzakirələri məmnunluqla xatırladaraq bildirib ki, iki ölkə arasında fəal siyasi dialoq davam edir. Onun sözlərinə görə, nümayəndə heyətlərinin geniş tərkibdə iştirakı Azərbaycan–Slovakiya münasibətlərinin inkişafına verilən önəmin göstəricisidir.

Dövlət başçısı qeyd edib ki, Qarabağda aparılan bərpa və yenidənqurma işləri Azərbaycanın əsas prioritetlərindən biridir. Bu baxımdan slovak şirkətlərinin həyata keçirilən layihələrdə iştirakı mühüm əhəmiyyət daşıyır. Prezident İlham Əliyev görüş zamanı tərəflərin ikitərəfli gündəlikdə yer alan məsələləri müzakirə edəcəyini və səfərin əməkdaşlığın inkişafına əlavə töhfə verəcəyinə əminliyini bildirib.

Slovakiya Prezidenti Peter Pelleqrini isə dəvətə görə təşəkkür edərək, Şuşaya səfərdən məmnunluğunu ifadə edib. O, azad edilmiş ərazilərdə qısa müddətdə həyata keçirilən genişmiqyaslı bərpa və infrastruktur layihələrinin onlarda böyük təəssürat yaratdığını vurğulayıb.

Peter Pelleqrini bildirib ki, Slovakiya şirkətlərinin Qarabağda həyata keçirilən layihələrdə iştirak etməsindən qürur duyurlar və gələcəkdə də bu əməkdaşlığın davam edəcəyinə ümid edirlər.

Görüşün geniş tərkibli hissəsindən sonra Prezident İlham Əliyev və Slovakiya Prezidenti Peter Pelleqrini qarşılıqlı hədiyyələr təqdim ediblər.

Bu gün, 14:22 8