Sumqayıt şəhərinin Çerkassi küçəsində yaşayan sakinlər yolun vəziyyəti və aparılan təmir işləri ilə bağlı narazılıqlarını bildirirlər.

Sumqayit.tv-yə daxil olan müraciətdə qeyd olunur ki, küçənin müəyyən hissəsində yolun çökməsindən sonra qazıntı işləri aparılsa da, problem uzun müddətdir tam aradan qaldırılmayıb. Sakinlərin sözlərinə görə, ərazidə təxminən 5 aydır ki, qazılmış hissələr mövcuddur və bu da nəqliyyatın və piyadaların hərəkətində çətinlik yaradır.

Müraciətdə bildirilir ki, yağışlı hava şəraitində kanalizasiya xətlərinin daşması və su sızmaları müşahidə olunur. Sakinlər hesab edirlər ki, yolun çökməsinə səbəb yeraltı kommunikasiya xətlərindəki problemlər ola bilər. Onların fikrincə, yalnız yol örtüyünün bərpası ilə kifayətlənmək problemin uzunmüddətli həllinə gətirib çıxarmaya bilər.

Vətəndaşlar həmçinin qeyd edirlər ki, ərazidə bəzi hissələrdə asfalt örtüyündə çökmələr aylarla aradan qaldırılmadan qalır. Onların sözlərinə görə, son günlər ərzində küçədə aktiv təmir işləri də müşahidə olunmayıb.

Sakinlər bildirirlər ki, mövcud vəziyyət səbəbindən təcili yardım, xidmət və digər nəqliyyat vasitələrinin hərəkətində çətinliklər yaranır.

Qeyd edək ki, Sumqayit.tv-yə təqdim olunan foto və video materiallarda küçədə aparılmış qazıntı işləri və yolun bəzi hissələrində yaranmış problemlər əks olunub.

Sumqayit.tv məsələ ilə bağlı aidiyyəti qurumların mövqeyini öyrənməyə və daxil olacaq cavabı dərc etməyə hazırdır.

17-07-2026, 16:55 71