56-cı Beynəlxalq Fizika Olimpiadasında (IPhO) Azərbaycanı uğurla təmsil edərək yüksək nəticə qazanan məktəblilər Zeynəb Məhəmmədli və Bəxtiyar Ağayev Sumqayıt Dövlət Universitetində (SDU) rektor, professor Nurəli Yusifbəyli ilə görüşüblər.

Sumqayit.tv xəbər verir ki, rektor olimpiada qaliblərini təbrik edərək onların qazandığı uğurların istedad, sistemli hazırlıq, müəllim əməyi və ölkədə yaradılan müasir təhsil mühitinin nəticəsi olduğunu bildirib. O vurğulayıb ki, bu nailiyyətlər Azərbaycanın beynəlxalq elmi nüfuzunun möhkəmlənməsinə və gənclərin elmə marağının artmasına mühüm töhfə verir.

Professor Nurəli Yusifbəyli qeyd edib ki, Prezident İlham Əliyevin rəhbərliyi ilə həyata keçirilən dövlət siyasətində elm, təhsil və insan kapitalının inkişafı əsas prioritetlərdən biridir. Onun sözlərinə görə, beynəlxalq fənn olimpiadalarında əldə olunan uğurlar ölkədə istedadlı gənclərin inkişafı üçün yaradılan imkanların və Elm və Təhsil Nazirliyinin bu istiqamətdə həyata keçirdiyi sistemli fəaliyyətin göstəricisidir.

Görüş zamanı qaliblərin gələcək təhsil planları, elmi maraqları və innovasiya sahəsində hədəfləri müzakirə olunub. Rektor gəncləri SDU-da həyata keçirilən elmi-tədqiqat, innovasiya, startap və beynəlxalq əməkdaşlıq layihələrində fəal iştirak etməyə dəvət edib və universitetin onlara hərtərəfli dəstək göstərməyə hazır olduğunu bildirib.

Sonda olimpiada qaliblərinin uğurlarında əməyi olan müəllim və valideynlərə təşəkkür edilib.

Bu gün, 20:16 6