Sumqayıtın Nizami küçəsində səkilərin yararsız vəziyyəti sakinlərin narazılığına səbəb olub.

Sumqayit.tv Avtosfer.az-a istinadən xəbər verir ki, küçənin Vərəm Dispanserinin binası ilə üzbəüz hissəsində, eləcə də keçmiş "Vaqif" teatrının qarşısında səki daşlarının olmaması və asfalt örtüyünün dağılması piyadaların hərəkətini çətinləşdirir.

Sakinlərin sözlərinə görə, həmin ərazilərdə səkilər uzun illərdir təmir olunmayıb. Onlar bildirirlər ki, yaxınlıqdakı park və dövlət qurumlarının yerləşdiyi hissələr bir neçə il əvvəl yenilənsə də, yaşayış binalarının qarşısındakı səkilər baxımsız qalıb.

Vətəndaşlar aidiyyəti qurumlara müraciət edərək Nizami küçəsindəki problemin qısa müddətdə aradan qaldırılmasını və səkilərin əsaslı şəkildə təmir olunmasını istəyirlər.

17-07-2026, 12:22 58