Sumqayıt şəhərinin Saray bağları (Bağlar) istiqamətində hərəkət edən 17 və 17A nömrəli marşrut avtobuslarından istifadə edən sakinlər nəqliyyat şəraiti ilə bağlı narazılıqlarını ifadə ediblər.

Sumqayit.tv Oxu.Az-a istinadən xəbər verir ki, sakinlərin sözlərinə görə, sözügedən marşrutlarda uzun illərdir köhnə avtobuslardan istifadə olunur və bu vəziyyət sərnişinlər üçün ciddi narahatlıq yaradır.

Onlar bildirirlər ki, yol infrastrukturunun yararsız vəziyyətdə olması səbəbindən səfərlər normadan artıq vaxt aparır. Sakinlərin iddiasına görə, bəzi hallarda mənzil başına çatmaq üçün 45-50 dəqiqə, hətta bir saata yaxın vaxt sərf olunur.

Müraciətdə qeyd olunur ki, yolun asfalt örtüyü uzun illərdir bərpa edilməyib. Sakinlər hesab edirlər ki, marşrut xəttinə müasir avtobusların buraxılmamasının əsas səbəblərindən biri də məhz yolun mövcud vəziyyətidir.

Vətəndaşlar xüsusilə yaşlı insanların və sağlamlıq problemləri olan sərnişinlərin köhnə avtobuslarla yararsız yollarda hərəkət etməkdə çətinlik çəkdiklərini vurğulayıblar.

Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, Sumqayıt şəhərində ictimai nəqliyyat xidmətlərinin təhlükəsizlik və keyfiyyət baxımından yaxşılaşdırılması məqsədilə marşrut xətləri üzrə təhlil və optimallaşdırma işləri aparılır.

Qurumdan verilən məlumata görə, həyata keçirilən tədbirlər çərçivəsində 17 və 17A nömrəli marşrutlarla bağlı qaldırılan məsələyə də baxılacaq.

17-07-2026, 20:28 62