Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) bir sıra şəhərlərarası və şəhərətrafı avtobus marşrutları üzrə keçirilən müsabiqələrin qaliblərini açıqlayıb.

Sumqayit.tv xəbər verir ki, müsabiqənin nəticələrinə əsasən, Sumqayıt–Qəbələ şəhərlərarası avtobus marşrutu üzrə fiziki şəxs Abdurahmanov Şahin Elşad oğlu qalib elan olunub.

Bununla yanaşı, Bakı–Qax, Bakı–Nabran, Bakı–Quba, Gəncə–Gədəbəy, Şəki–Mingəçevir, Mingəçevir–Gəncə, eləcə də Lənkəran–Astara, Astara–Lənkəran, Lənkəran–Masallı və Masallı–Lənkəran marşrutları üzrə də müsabiqə qalibləri müəyyən edilib.

AYNA-dan bildirilib ki, marşrut xətləri müvafiq qanunvericiliyin tələblərinə uyğun olaraq mərhələli qaydada müsabiqəyə təqdim edilir. Məqsəd sərnişindaşıma sahəsində xidmət keyfiyyətinin, təhlükəsizliyin və sərnişin rahatlığının artırılması, həmçinin marşrutların təhkim edilməsində şəffaflığın təmin olunmasıdır.

Qeyd edək ki, şəhərlərarası marşrutlar üzrə keçirilən müsabiqələr sərnişindaşıma xidmətlərinin müasirləşdirilməsi və daşıyıcılar arasında sağlam rəqabət mühitinin formalaşdırılmasına xidmət edir.

22-07-2026, 10:15 70