Masazır qəsəbəsində Pakistan vətəndaşı və atasına qarşı törədilmiş ağır cinayətlə bağlı məhkəmə işi yenidən apellyasiya instansiyasında araşdırılacaq.
Sumqayit.tv Pravda.az-a istinadən xəbər verir ki, Ali Məhkəmə Şri-Lanka vətəndaşlarının kassasiya şikayətini qismən təmin edərək Sumqayıt Apellyasiya Məhkəməsinin qərarını ləğv edib və cinayət işini yeni baxış üçün həmin məhkəməyə göndərib.
Hadisə 2022-ci ilin sentyabr ayında Masazır qəsəbəsində baş verib. İstintaq materiallarına əsasən, təqsirləndirilən şəxslər Azərbaycanda yaşamaq və işləmək üçün vasitəçilik edən Pakistan vətəndaşını və onun atasını mənzilə çağıraraq onlara bıçaq və şüşə butulka ilə xəsarətlər yetirib, pul və mobil telefonlarını ələ keçiriblər. Daha sonra mənzilə qaz buraxaraq zərərçəkənləri bağlı vəziyyətdə qoyub hadisə yerindən qaçıblar.
Zərərçəkənlərin özlərini xilas edərək polisə məlumat verməsi nəticəsində mümkün faciənin qarşısı alınıb.
Xatırladaq ki, Sumqayıt Ağır Cinayətlər Məhkəməsinin hökmü ilə təqsirləndirilən şəxslərdən ikisi 15 il, biri isə 14 il 9 ay müddətinə azadlıqdan məhrum edilib. Ali Məhkəmənin qərarına əsasən, işə yenidən apellyasiya instansiyasında baxılacaq.
23-07-2026, 12:18
106
