Sumqayıtda fəaliyyət göstərən peşə təhsili müəssisələrindən birində yenidənqurma və əsaslı təmir işləri aparılacaq.
Sumqayit.tv xəbər verir ki, bu barədə Peşə Təhsili üzrə Dövlət Agentliyinin direktoru İlqar Bayramlı keçirdiyi brifinqdə məlumat verib.
Onun sözlərinə görə, hazırda ölkə üzrə peşə təhsili müəssisələrinin infrastrukturunun yenilənməsi istiqamətində ümumilikdə 16 layihə icra olunur. Bu layihələrdən 4-ü artıq başa çatıb, 5-də isə tikinti və əsaslı təmir işləri davam etdirilir.
İlqar Bayramlı bildirib ki, daha 7 peşə təhsili müəssisəsi üzrə yenidənqurma və əsaslı təmir layihələri hazırlanır. Həmin siyahıya Sənaye və Yüksək Texnologiyalar üzrə Sumqayıt Dövlət Peşə Təhsil Mərkəzi də daxildir.
Qeyd edək ki, layihənin həyata keçirilməsi təhsil ocağının maddi-texniki bazasının gücləndirilməsinə və tələbələr üçün daha müasir tədris şəraitinin yaradılmasına xidmət edəcək.
23-07-2026, 13:44
68
