Son günlər taksi fəaliyyəti ilə bağlı tətbiq edilən yeni tələblər Sumqayıt şəhərində də müzakirə mövzusuna çevrilib. Sosial şəbəkələrdə yayılan məlumatlara görə, taksi sürücüləri buraxılış kartını hansı ərazi üzrə alıblarsa, yalnız həmin ərazi daxilində fəaliyyət göstərə bilərlər.

Məsələ ilə bağlı taksi sürücülərinin bir qismi bildirir ki, bu yanaşma təklif və tələb arasında uyğunsuzluq yarada, nəticədə sərnişinlərin taksi tapmasında çətinliklərə səbəb ola bilər. Digər sürücülər isə hələlik belə bir qaydanın praktikada tam tətbiq olunmadığını deyirlər.

Azərbaycan Yerüstü Nəqliyyat Agentliyindən bildirilib ki, “Avtomobil nəqliyyatı haqqında” Qanunun 20.2-ci maddəsinə əsasən, taksi fəaliyyəti buraxılış kartında göstərilən ərazi hüdudları daxilində həyata keçirilməlidir. Qanunvericiliyə əsasən, bu tələbin pozulması 50 manat məbləğində inzibati cərimə ilə nəticələnir.

Mövzu ilə bağlı nəqliyyat eksperti Aslan Əsədovun bizim.media-ya bildirdiyinə görə, bu yanaşma Sumqayıt kimi iri şəhərlərdə müəyyən çətinliklər yarada bilər. Ekspert qeyd edir ki, bəzi ərazilərdə taksi sayı tələbi qarşılamaya bilər, digər ərazilərdə isə təklif çox, tələb az ola bilər ki, bu da həm sürücülər, həm də sərnişinlər üçün əlverişsiz vəziyyət yaradır.

Qeyd edək ki, taksi xidmətlərindən aktiv istifadə əsasən Bakı ilə yanaşı Sumqayıt və Gəncə şəhərlərində müşahidə olunur. Bu baxımdan tətbiq edilən tələblərin Sumqayıtda taksi bazarına təsiri mütəxəssislər tərəfindən izlənilməli və vəziyyətə uyğun tənzimləmələr aparılmalıdır.

23-01-2026, 15:55 125