20 Yanvar faciəsinin 36-cı ildönümü münasibətilə Sumqayıt şəhərində anım mərasimi keçirilib. Şəhər ictimaiyyəti şəhidlərin xatirəsini yad etmək üçün Şəhidlər xiyabanını ziyarət edib.
Saat 12:00-da ölkə üzrə olduğu kimi, Sumqayıtda da bir dəqiqəlik sükut elan olunub, nəqliyyatın hərəkəti dayandırılıb və şəhidlərin xatirəsi ehtiramla anılıb.
Mərasimdə Sumqayıt Şəhər İcra Hakimiyyətinin başçısı Zakir Fərəcov, Milli Məclisin deputatları, hüquq-mühafizə orqanlarının nümayəndələri, idarə və müəssisələrin kollektivləri, şəhid ailələri, qazilər və veteranlar iştirak ediblər.
İştirakçılar “Qalib Əsgər” abidəsi önünə və şəhidlərin məzarları üzərinə gül dəstələri qoyub, dualar oxuyublar.
Qeyd edilib ki, 1990-cı il yanvarın 20-də baş verən hadisələr Azərbaycan xalqının müstəqillik uğrunda mübarizəsini daha da gücləndirib.

20-01-2026, 15:43 15