Bu gün Milli Məclisin deputatı Elnarə Akimova "Stansiya Sumqayıt" Dəmiryolunun "Yük Həyəti" adlanan ərazisinin sakinləri ilə görüş keçirib.

Sumqayıt.tv xəbər verir ki, görüş saytımızda 15 yanvar tarixində dərc olunan “Sumqayıtda 6 mindən çox sakinin yaşadığı ərazi kanalizasiya böhranı ilə üz-üzədir” sərlövhəli yazıdan sonra baş verib.

Daxil olan şikayətdə bildirilirdi ki, sözügedən ərazidə uzun illərdir həllini tapmayan kanalizasiya problemi mövcuddur. Sakinlər bildiriblər ki, məsələ ilə bağlı dəfələrlə aidiyyəti qurumlara rəsmi və qeyri-rəsmi müraciətlər ünvanlasalar da, problem həllini tapmayıb. Vəziyyətin kritik həddə çatması səbəbindən bəzi ailələr qış aylarında yaşadıqları mənzilləri tərk edərək kirayə evlərə köçmək məcburiyyətində qalıblar. 
Yazı Sumqayit.tv-də dərc olunduqdan dərhal sonra sakinlər redaksiyamıza bildirdilər ki, ərazinin deputatı Elnarə Akimovanın köməkçisi dərhal onlarla əlaqə saxlayıb və deputatın onlarla görüşmək istədiyini bildirib. 

Bu gün isə məlumat aldıq ki, ərazi üzrə Milli Məclisin deputatı Elnarə Akimova yaranmış vəziyyəti yerində müşahidə edib, su basmış sahələrə baxış keçirib və sakinlərin şikayətlərini dinləyib. Görüş zamanı sakinlər əraziyə rəsmi yaşayış statusunun verilməsini, həmçinin kanalizasiya xəttinin çəkilməsi ilə bağlı problemləri diqqətə çatdırılmasını deputatdan xahiş ediblər. 

Milli Məclisin deputatı Elnarə Akimova öz növbəsində seçicilərinə bildirib ki, səlahiyyətləri çərçivəsində problemin həllinə nail olmağa çalışacaq.

Müəllif: Sumqayit.tv

22-01-2026, 16:48 360