“Bakı və Sumqayıt şəhərlərinin kanalizasiya sistemlərinin  bütünlüklə mərkəzləşdirilmiş su təmizləmə qurğularına birləşdirilməsi üçün 10-15 il vaxt lazımdır”
Ekologiya və təbii sərvətlər nazirinin müşaviri Rasim Səttarzadə Milli Məclisin Təbii ehtiyatlar, energetika və ekologiya komitəsinin iclasında bildirib ki, Bakı şəhərində tullantı sularının 60%-ni təmizləmək mümkündür. 
Demokrat.az xəbər verir ki, nazirlik rəsmisinin sözlərinə görə suyun qalan hissəsi ətraf mühitə və ya Xəzər dənizinə axıdılır.

Hidroloq Rövşən Abbasov Demokrat.az-a açıqlamasında  deyib ki, Bakı şəhəri və Abşeron yarımadasında əmələ gələn çirkab sularının qeyd edilən faizi mərkəzləşdirilmiş təmizləmə sistemlərinə qoşulub:
“Abşeron yardımadasının xüsusilə şimal hissəsi – Pirşağı, Novxanı, Fatmayı, bağlar massivi, Zirə və Türkan istiqamətlərində olan evlərin ətrafında hələ də mərkəzləşdirilmiş kanalizasiya sistemləri qurulmayıb. Bu sahədə işlər gedir.
Hazırda Pirşağıda yeni mərkəzləşdirilmiş su təmizləmə sistemi istifadəyə verilməkdədir”. 
Ekspert qeyd edib ki, bu qurğu sutkada 40 min ton suyu təmizləmək gücünə malikdir:
“Pirşağı və ətraf ərazilərdə yerləşən 11 yaşayış massivindən axıdılan çirkab suları təmizlənərək dənizə axıdılacaq. Ümumiyyətlə, Abşeronun digər yerlərində də su təmizləmə qurğularının istifadəyə verilməsi mümkündür, lakin çox vaxt tələb edir. Təxmini hesablamalarıma görə Bakı və Sumqayıt şəhərlərinin kanalizasiya sistemlərinin 100 faiz mərkəzləşdirilmiş su təmizləmə qurğularına birləşdirilməsi üçün 10-15 il vaxt lazımdır”.