Deputat Səbinə Salmanova Sumqayıt şəhərində məskunlaşan bir qrup Xocalı sakini ilə görüşüb.

Sumqayit.tv-in məlumatına görə, görüş zamanı deputat bildirib ki, 1992-ci il fevralın 25-dən 26-na keçən gecə törədilmiş Xocalı faciəsi təkcə Azərbaycan xalqına qarşı deyil, bütün bəşəriyyətə qarşı yönəlmiş ən ağır soyqırımı cinayətlərindən biridir. O vurğulayıb ki, Xocalı qurbanlarının xatirəsi daim yaşayır və bu tarixi həqiqətlərin dünya ictimaiyyətinə çatdırılması hər bir vətəndaşın borcudur.

Xocalı sakinləri ilə söhbət zamanı onların keçdiyi ağır həyat yolu və yaşadıqları ağrı-acılar bir daha xatırlanıb, şəhidlərin xatirəsi dərin ehtiramla yad edilib.

Deputat, həmçinin qeyd edib ki, 2020-ci ildə baş vermiş 44 günlük Vətən müharibəsi və 2023-cü ilin sentyabrında həyata keçirilmiş lokal antiterror tədbirləri nəticəsində Azərbaycanın suverenliyi və konstitusiya quruluşu tam bərpa olunub. Onun sözlərinə görə, **İlham Əliyev**in qətiyyətli rəhbərliyi, Azərbaycan Ordusunun rəşadəti və xalqın birliyi sayəsində əldə edilən bu tarixi Zəfər Xocalı qurbanlarının qanının yerdə qalmadığını nümayiş etdirib.

Bildirilib ki, hazırda azad edilmiş ərazilərdə genişmiqyaslı bərpa və quruculuq işləri aparılır, keçmiş məcburi köçkünlərin doğma yurdlarına qayıdışı mərhələli şəkildə təmin olunur. Deputat bütün bunları dövlətin gücünün, xalqın birliyinin və ədalətin təntənəsinin bariz nümunəsi kimi dəyərləndirib.

Dünən, 15:16 30