Səhiyyə Nazirliyinin Respublika Qan Bankı ölkə üzrə fəaliyyət göstərən regional strukturları çərçivəsində Sumqayıt şəhərində də qan xidmətləri təşkil olunur.

Sumqayit.tv xəbər verir ki, bunu Respublika Qan Bankının icraçı direktoru Elxan Nağıyev Teleqraf İnformasiya Agentliyinə verdiyi müsahibəsində bildirib.

Onun sözlərinə görə, Sumqayıt regional bölməsi vasitəsilə şəhər və ətraf ərazilərdə könüllü qan donorluğunun təşkili, mobil qanvermə aksiyalarının keçirilməsi, tibb müəssisələrinin qan və qan komponentlərinə olan tələbatının operativ şəkildə qarşılanması təmin edilir. Eyni zamanda, fövqəladə hallar üçün strateji qan ehtiyatlarının formalaşdırılması və saxlanılması da əsas fəaliyyət istiqamətləri sırasındadır.

Elxan Nağıyev qeyd edib ki, Sumqayıtda fəaliyyət göstərən mobil qan toplama briqadaları müxtəlif idarə və təşkilatlarda mütəmadi olaraq qanvermə aksiyaları keçirir. Bu isə vətəndaşların donorluq prosesində iştirakını asanlaşdırmaqla yanaşı, qan ehtiyatlarının davamlılığının təmin olunmasına mühüm töhfə verir.

Qeyd edək ki, Respublika Qan Bankı ölkə üzrə qan xidmətini mərkəzləşdirilmiş idarəetmə prinsipi əsasında həyata keçirir və bütün regionlarda təhlükəsiz, fasiləsiz qan təminatını əsas prioritet kimi müəyyən edib.

23-02-2026, 13:20 93