“Uzun müddətdir ki, Qarabağ məsələsi Ermənistan hakimiyyətinin gündəmində deyil”.
Sumqayit.tv xəbər verir ki, bunu erməni politoloq Hermina Mxitaryan deyib.
Ekspert Azərbaycanın əsas hədəfinin Zəngəzur dəhlizinin açılması və Ermənistandakı anklavlarının qaytarılması olduğunu söyləyib:
Mxitaryanın sözlərinə görə, Ermənistan-Azərbaycan münasibətlərinin tənzimlənməsi ilə bağlı çoxlu suallar var: “Burada dəhlizin (Zəngəzur) açılmasından və anklav problemindən danışmaq olar”.
Politoloq Ermənistan hakimiyyətinin Azərbaycana qarşı beynəlxalq ictimaiyyətdən dəstək ala bilmədiyini də söyləyib:
“Beynəlxalq ictimaiyyətdən nə gözləmək olar? Bir daha əmin olduq ki, beynəlxalq ictimaiyyət heç bir şəkildə Azərbaycana təsir edə bilmir. Ümumiyyətlə, hər hansı bir dövlətin və ya beynəlxalq təşkilatın Ermənistanı müdafiə etməsini gözləmək bir qədər sadəlövhlükdür”.
Onun sözlərinə görə, Ermənistan hakimiyyəti artıq Qarabağ məsələsinə başqa prizmadan, yəni Azərbaycanın ərazi bütövlüyü çərçivəsindən baxır:

“Ermənistan hakimiyyəti nəzəri cəhətdən Qarabağı (dağlıq hissəsini) tam təhvil verib. Artıq Qarabağ ermənilərinin onun gündəmində olmadığı faktdır. Tam deyə bilərik ki, Ermənistan hakimiyyəti Qarabağdan əlini çəkib. Bu, uzun müddətdir aşkar formada yürüdülən siyasətdir. Bu gün Ermənistan hökuməti yalnız Qarabağ ermənilərinin hüquqlarından danışır. Yəni məsələyə insan haqları müstəvisində baxırlar. Qarabağ məsələsi uzun müddətdir ki, bu hakimiyyətin gündəmində deyil.
44 günlük müharibədən əvvəl də insan hüquqlarının qorunmasından danışırdılar. Qarabağın “siyasi status”u və “tanınması” məsələləri arxa plana keçdi. Müharibədən sonra bu məsələlər Ermənistan hakimiyyəti üçün prioritet olmaqdan çıxdı. BMT Təhlükəsizlik Şurasının iclası bu məsələlərin gündəmə gətirilməsi üçün ən yaxşı platformalardan biri idi. Amma Ermənistan nümayəndəsi çıxışında bir kəlmə də bu haqda danışmadı. Başqa sözlə, Ermənistan rəhbərliyi bu məsələlərə artıq başqa prizmadan baxır və bunları insan hüquqlarının təmin edilməsi sahəsinə aparır”.
Mxitaryan Ermənistan hakimiyyətinin ölkədəki anti-Rusiya əhval-ruhiyyəsini dərinləşdirdiyini da söyləyib:
“Bu, əvvəllər qəbul edilmiş xarici siyasi oriyentasiyaların dəyişdirilməsi siyasətinin davamıdır. 2018-ci ildən bunun embrionlarını görmüşük. Müharibə və ondan sonrakı gəlişmələr cəmiyyətdə anti-Rusiya əhval-ruhiyyəsi aşılamaq baxımından hakimiyyətlər üçün yeni imkanlar yaratdı. Hakimiyyət anti-Rusiya əhval-ruhiyyəsini dərinləşdirmək siyasətini davam etdirir. Digər tərəfdən, bu gün cəmiyyətimiz Rusiya sülhməramlılarının rolu ilə bağlı ifrata varıb”.
Teleqraf.com