Azərbaycanda Yankoviç deyəndə "Qarabağ"ın Markosu yada düşür. Monteneqro millisinin üzvü gəldiyi ilk günlərdən səviyyəsini ortaya qoyub.

Onun yoxluğu "Qarabağ" üçün faciə hesab olunur. Bir də indi-indi parlayan onun adaşı var. Hələki səssizliyə qoşulub, adından meydanda söz etdirir.

Söhbət "Sumqayıt"ın Yankoviçindən gedir. 25 yaşlı serbiyalı bir vaxtlar vətənində ən istedadlı gənclərdən hesab olunurdu.

Serbiya gənclər millisində də çıxış edib. Amma zamanla ondan olan gözləntiləri doğrulda bilməyib.

Yayda formasını geyindiyi "Sumqayıt"da isə özünü yenidən kəşf etməkdədir. Hər ötən tur daha yaxşı Yankoviç görürük.

Görəsən, yığdığı sürət Aleksanı da "Qarabağlının" yüksəldiyi zirvəyə apara bilərmi?

Futbolçu Sportinfo.az-a açıqlamasında bunları deyib:

"İndi mənim də soyadımı çəkməyə başlayıblar. Təbii ki, buna ancaq sevinə bilərəm. Motivasiyama, performansıma müsbət təsir edir. Daha yaxşı olmağa çalışıram.

Belə davam etməliyəm. Çünki onun səviyyəsinə gəlmək üçün daha çox işləməliyəm. O, yüksək səviyyəli oyunçudur".