Bu gün Sumqayıtın Corat qəsəbəsində 2023-cü ilin oktyabrın 28-də baş vermiş dəhşətli hadisədən iki il ötür.
Sumqayit.tv xəbər verir ki, həmin gün səhər saatlarında Corat bağları yaşayış massivində yerləşən fərdi evə silahlı basqın olub. Hadisə nəticəsində Susana Karakaş, Dağbəyi Fərəcov və Serkan Karakaş həyatını itirib, daha bir neçə nəfər – Tərlan Fərəcova, Etibar Sarıyev və Mehman Sarıyev müxtəlif dərəcəli bədən xəsarətləri alıb.

Qətldə şübhəli bilinən Corat sakini Müşfiq Tağıyev polis əməkdaşları tərəfindən qısa zamanda saxlanılıb. İstintaqla onun qonşusu Anar Fərəcovdan qisas almaq məqsədilə əvvəlcə evin divarlarına benzin tökərək yandırdığı, daha sonra isə partlayıcı qurğunu işə salıb odlu silahdan atəş açdığı müəyyən olunub.

Məhkəmənin qərarı ilə Müşfiq Tağıyev ömürlük azadlıqdan məhrum edilib.
Hadisə Sumqayıt ictimaiyyətində dərin iz buraxıb və bu gün də şəhər sakinləri o faciəni unutmur.