Onun sözlərinə görə, ümumiyyətlə ABŞ-ın xarici siyasət strategiyasına nəzər saldıqda bu ölkənin hər zaman uzunmüddətli, planlı və hərtərəfli siyasət yürütdüyünü görmək olar: "ABŞ dünyanın demək olar bütün bölgələri ilə hərbi, iqtisadi, siyasi və mədəni bağlılıq quraraq öz siyasətini şəkilləndirir və təsir imkanlarını genişləndirir. O cümlədən, Vaşinqtonun bu siyasəti bizim region üçün də keçərlidir. ABŞ Qafqaz bölgəsində yumşaq siyasət yürütməklə öz varlığını ortaya qoymaqda maraqlıdır. Bildiyimiz kimi, Amerika Birləşmiş Ştatları Qafqaza 200 ildir özünün arxa baxçası kimi baxan Rusiya ilə ciddi mübarizə şəraitindədir. Bu iki ölkə demək olar ki, bir çox nöqtələrdə, o cümlədən Qafqazda amansız rəqabət içərisindədir".
Politoloq sözlərinə davam edərək bildirib ki, bu səbəbdən həm Bakı, həm də İrəvanla tez-tez əlaqələr qurur və cərəyan edən prosesin lokomotivi rolunda çıxış etmək istəyir: "Xüsusən də bu mübarizənin əsas konturları Ermənistan üzərində çizilir. Belə ki, Qərb, Paşinyanı iqtidara gətirməklə, Ermənistanda Rusiyanın əlindən siyasi rıçaqları ala bildi. İndi də Qərb istəyir ki, Rusiyanın Ermənistan üzərində olan digər təsir imkanlarını da alsın. Beləliklə, Moskvanı tam olaraq Qafqazdan çıxartsın. Bunun üçün əsasən də Qarabağ kartından istifadə edilir. Məlum güclər üçün Qarabağ kartı üzərindən Ermənistana və ermənilərə təsir etmək ən rahat variantdır. Amma mütləq ki, bu məsələdə Azərbaycanı da gözardı etmək mümkun deyil. Çünki, Azərbaycanın Qarabağ siyasəti bir çox hallarda nə ABŞ-ın, nə Rusiyanın, nə də Aİ-nin maraqları ilə uzlaşmır. Belə ki, istər ekofəalların aksiyaya başlaması, yaxud Azərbaycan tərəfinin Laçında sərhəd nəzarət-keçid məntəqəsini qurması Ermənistana hamilik edən bütün qüvvələri ciddi mənada narahat etdiyindən, Bakının yürütdüyü siyasətə qarşı gah bəyanat verdilər, gah zəng etdilər, gah da Azərbaycana səfər edərək ölkə rəhbərliyini geri addım atmaq üçün dilə tutmağa çalışdılar. Hər dəfə də rəsmi Bakının qəti və geriyədönməz siyasəti ilə qarşılaşdılar. Bu da Ermənistanı əldə etmək üçün yarışa çıxan dövlətləri çətin vəziyyətə salır.
Belə olduğu halda Bakı və İrəvanı bir masa arxasında əyləşdirmək, birbaşa dialoqlar qurmaq və sülh prosesinə nail olmaq ücun ABŞ maraqlı görünür. Çünki regionda sülhün bərqərar olunması Vaşinqtonun vasitəçiliyi ilə baş tutacağı təqdirdə dediyimiz kimi, Rusiyanın Qafqazda sözünün çəkisi azalmış olacaq. Ona görə də ABŞ məcburdur ki, tərəf kimi Azərbaycanın maraqlarını nəzərə alıb, əlaqələrini inkişaf etdirsin və Bakıya diqqətini artırsın".
Müəllif: Ləman Əlizadə