Sumqayıt şəhəri, 10-cu mikrorayon, 28 nömrəli məktəbin arxasında yerləşdirilmiş zibil qutuları ətrafda yaşayan sakinlərin ciddi narazılığına səbəb olub.

Məsələ ilə bağlı Sumqayit.tv-in redaksiyasına müraciət edən sakinlər bildirirlər ki, zibil qutularından sızan tullantı suları yola axaraq ərazidə xoşagəlməz qoxu və anti-sanitariya vəziyyəti yaradır. Onların sözlərinə görə, zibil maşınları tullantıları daşıyarkən zibillərin bir hissəsi yığılmadan ətrafa tökülür və vəziyyət günü-gündən pisləşir.

“Üzr istəyirik ifadəmizə görə, amma zibilin suyu küçəyə axır, iyindən yanından keçmək olmur. Məktəbin arxasında uşaqlar hər gün bu mənzərə ilə üzləşirlər. Bu, həm sağlamlıq, həm də təhlükəsizlik baxımından çox böyük riskdir”, – deyə sakinlər şikayətlərində bildiriblər.

Onların sözlərinə görə, məktəbə gedib-gələn uşaqlar da bu vəziyyətdən əziyyət çəkirlər. Valideynlər və əhali aidiyyatı qurumlardan dərhal tədbir görülməsini tələb edirlər.

Məsələ ilə bağlı Sumqayıt şəhər İcra Hakimiyyəti və Sumqayıt Təmizlik Departamentinin münasibətini öyrənməyə çalışacağıq.

Sumqayıt TV məsələni diqqətdə saxlayır.