Bakıda keçirilən cüdo üzrə U-14 yeniyetmələr arasında Liqa yarışının III turunda Sumqayıt təmsilçiləri uğurlu çıxış ediblər.
Sumqayit.tv xəbər verir ki, Sumqayıt şəhər idmançıları ümumilikdə 1 qızıl, 1 gümüş və 2 bürünc medal qazanıblar.

Fövqəladə Hallar Nazirliyinin İdman-Sağlamlıq Mərkəzində təşkil olunan yarışda yüzlərlə idmançı mübarizə aparıb.

Oğlanlar arasında 60 kq çəki dərəcəsində Sumqayıt şəhəri 1 nömrəli İOEUGİŞM-in təmsilçisi Kənan İsmayılov gümüş medal qazanıb. Eyni çəki dərəcəsində Sumqayıt şəhəri 2 nömrəli UGİŞM-in yetirməsi Rəsul Abuzərov bürünc medala sahib olub.

73 kq-da Sumqayıt şəhəri 2 nömrəli UGİŞM-in təmsilçisi Əli Qulamlı bütün rəqiblərinə qalib gələrək birinci yerə layiq görülüb.

Qızlar arasında 40 kq çəki dərəcəsində Sumqayıt şəhəri 2 nömrəli UGİŞM-in yetirməsi Zeynəb İsgəndərli bürünc medalla kifayətlənib.

Qeyd edək ki, yarışda ümumilikdə 80 klub və idman cəmiyyətindən 390 idmançı (313 oğlan, 77 qız) iştirak edib. Cari ildə U-14 Liqa yarışının dörd turunun keçirilməsi nəzərdə tutulur. Bu yarışların nəticələrinə əsasən idmançıların reytinq siyahısı formalaşacaq.