“Ermənistanın belə biabırçı vəziyyətə düşməsində günahkar hakimiyyətdir, ona görə də bütün addımlar onların aradan qaldırılmasına yönəlməlidir”.
Sumqayit.tv erməni mediasına istinadən xəbər verir ki, bunu parlamentdə jurnalistlərlə söhbətində müxalif “Ermənistan” blokunun yeni deputatı Levon Köçəryan deyib.
Qeyd edək ki, Paşinyan hakimiyyəti sırf deputat olduğu üçün həbsxanadan buraxılan Levon Köçəryandan əl çəkmək niyyətində deyil. Hakim “Vətəndaş sazişi” partiyasının onun deputat toxunulmazlığından məhrum edilməsi məsələsini müzakirə etdiyi barədə məlumatlar gəzir.
“Bunların hamısı fərziyyələrdir. Mən özüm də buna bənzər şeylər eşitmişəm. Əgər insanlar öz əsas vəzifəsinin öhdəsindən gələ bilmirlərsə - ölkənin təhlükəsizliyini təmin edə bilmirlərsə, onların edə biləcəyi yeganə şey “keçmiş”lərindən yapışıb şou göstərməyə çalışmaqdır”, - deyə Levon Köçəryan bildirib.