Hazırda Azərbaycanda narkotik asılılığına qarşı metadonla əvəzedici müalicə proqramı çərçivəsində 730 nəfər müalicə alır. Onlardan 129 nəfəri Sumqayıt Narkoloji Mərkəzində qeydiyyatdadır.

Sumqayit.tv xəbər verir ki, bu barədə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının icmalında qeyd olunub. Bildirilib ki, metadonla əvəzedici müalicə proqramı üzrə Respublika Narkoloji Mərkəzində 287, QİÇS-lə Mübarizə Mərkəzində 314, Sumqayıt Narkoloji Mərkəzində isə 129 nəfər xəstə müalicə olunur.

Məlumata görə, Respublika QİÇS-lə Mübarizə Mərkəzinin məlumatı əsasında ölkədə İnsanın İmmunçatışmazlığı Virusuna yeni yoluxma hallarında azalma müşahidə edilir. 2025-ci ilin sentyabr ayının sonuna kimi aşkarlanmış İİV-ə yoluxmuş Azərbaycan vətəndaşları arasında 46 nəfər (4,8%) inyeksion narkotik istifadəçisi olub.

Ekspertlər bildirirlər ki, Sumqayıtda aparılan bu proqram narkotik asılılığının azaldılmasına və ictimai sağlamlığın qorunmasına mühüm töhfə verir.