Sumqayıt şəhərinin 10-cu mikrorayon ərazisində, 24 nömrəli tam orta məktəbin yaxınlığında yaşayan sakinlər antisanitar vəziyyətdən ciddi narazılıq edirlər. İzləyicimizin redaksiyamıza göndərdiyi məlumata görə, zibil konteynerləri uzun müddətdir ki, vaxtında daşınmadığından əraziyə kəskin qoxu yayılıb.

Sakinlərin sözlərinə görə, zibil yığınlarının dolu olması səbəbindən bəzi vətəndaşlar tullantıları yerə atmaq məcburiyyətində qalır, bu isə vəziyyəti daha da pisləşdirir.

> “Allaha and olsun, bezmişik. Pəncərəni açmaq olmur, iy qoxudan nəfəs almaq mümkün deyil. Antisanitar vəziyyət baş alıb gedir,” — deyə ərazidə yaşayan sakin bildirir.

Qonşuluqda məktəb binasının yerləşməsi isə vəziyyətin xüsusilə narahatedici hal almasına səbəb olub. Valideynlər və yerli sakinlər aidiyyəti qurumlardan bu problemə dərhal müdaxilə edilməsini tələb edirlər.

Qeyd edək ki, ərazidə tullantıların vaxtında daşınmaması həm ekoloji, həm də sanitar-epidemioloji vəziyyət üçün təhlükə yarada bilər.