Vətən uğrunda canından keçən qəhrəmanların əziz xatirəsi hər zaman xalqımızın yaddaşında yaşayır. Məhz bu dəyərlərin qorunması və şəhid ailələrinə mənəvi dəstəyin ifadəsi məqsədilə bir qrup şəhid ailəsi Naxçıvana xüsusi səfər edib.

Səfərin ilk ünvanı müqəddəs xatirə məkanı — Naxçıvan Şəhidlər xiyabanı olub. Burada şəhid ailələri Vətənimizin azadlığı və suverenliyi uğrunda canını fəda etmiş qəhrəman övladlarımızın məzarlarını ziyarət edərək, onların xatirəsini ehtiramla yad ediblər. Bu anlar həm kədər, həm də qürur dolu idi. Çünki hər bir şəhid xalqın azad sabahı üçün öz canını fəda edib.

Ziyarət proqramının növbəti dayanacağı mənəvi dəyəri ilə seçilən möcüzəli Ashabi-Kəhf ziyarətgahı olub. Müqəddəs məkanda şəhidlərimizin ruhuna dualar oxunub, ailələrə mənəvi dayaq və dəstək göstərilib.

Bu səfər təkcə bir ziyarət deyil, həm də şəhid ailələrinin yanında olmağın, onların dərdini bölüşməyin, qəhrəmanlarımızın adını daim yaşatmağın simvoludur.

Qeyd edək ki, bu mənəvi səfər şəhid ailələrinə dəstək məqsədilə Milli Məclisin deputatı Səbinə Salmanovanın təşəbbüsü ilə həyata keçirilib.