Türkiyə Respublikasının İstanbul şəhərində “IX Türkiyə Arıçılıq Sərgisi” və Antalya şəhərində “XIV Şəcərə, ilkin şəcərə və döl kampaniyasının idarə edilməsi - illik layihə qiymətləndirmə və təlim” toplantısı keçirilib.

Haliç Konqress Mərkəzində keçirilən “IX Türkiyə Arıçılıq Sərgisi”ndə dünyanın müxtəlif ölkələrindən arıçılar və mütəxəssislər iştirak edib. Tədbirdə Azərbaycanı Kənd Təsərrüfatı Nazirliyinin Heyvandarlığın təşkili və monitorinqi şöbəsinin müdiri Eldar Həsənov və Heyvandarlıq Elmi-Tədqiqat İnstitutunun (HETİ) direktoru Mahir Hacıyev təmsil ediblər. Arıçılıq Ləvazimatları və Arı məhsulları Sənayeçiləri Birliyinin (“ARMASAD) təşkilatçılığı ilə həyata keçirilən sərgidə arı xəstəliklərinə qarşı yeni nəsil dərman preparatları və onların tətbiqi, qışlama dövrü üçün yemlər, sənaye arıçılığının inkişafı və təşkili üçün arıçılıq avadanlıqları və ləvazimatları, bal süzümü və qablaşırılması, markalanması üzrə müasir texnologiyalar, probiotiklər və onlardan istifadə qaydaları, keyk  və proteinlər, apiterapiya və gigiyena üçün hazırlanmış arı məhsulları, qida məqsədilə arı məhsullarından hazırlanmış şirniyyatlar nümayiş olunub.  
Sərgi çərçivəsində Türkiyə Kənd Təsərrüfatı və Meşə Nazirliyi, TİKA-nın Turkiyə ofisinin nümayəndələri, “ARMASAD”ın İdarə Heyətinin üzvləri, “Benka” təşkilatının rəhbəri ilə görüşlər keşirilib. İki ölkənin Arıçılar Assosiasiyaları  və birliklərinin iştirakı ilə dəyirmi masa təşkil edilib, arıçılar arasında birliyinin yaradılması, əməkdaşlığın genişləndirilməsi istiqamətində müzakirələr aparılıb.
Nümayəndə heyəti Antalyanın Kəmər əyalətində keçirilən “XIV Şəcərə, ilkin şəcərə və döl kampaniyasının idarə edilməsi - illik layihə qiymətləndirmə və təlim” toplantısında da iştirak edib. Türkiyənin 81 əyalətindən nümayəndələrin iştirak etdiyi tədbir çərçivəsində nümayəndə heyəti Türkiyə Kənd Təsərrüfatı və Meşə Nazirliyinin nümayəndələri,  Damazlıq İribuynuzlu Yetişdiriciləri Mərkəz Birliyinin rəhbər, üzv və nümayəndələri ilə görüşlər keçirib. Tədbir çərçivəsində Azərbaycan nümayəndə heyəti son illər ölkəmizdə heyvandarlıq sektorunda görülmüş işlər, yeni yaradılmış laboratoriyalar və seleksiya-damqazlıq işləri ilə bağlı təqdimatla çıxış ediblər. Görüşlərdə Azərbaycan və Türkiyə arasında kənd təsərrüfatı sahəsində əməkdaşlığın genişləndirilməsi, damazlıq işinin heyvandarlıqda əhəmiyyəti, damazlıq heyvanların yetişdirilməsi sahəsində təcrübə mübadiləsi, damazlıq heyvanların elektron məlumat bazasının Azərbaycanda yaradılması imkanları barədə müzakirələr aparılıb.