Oktyabrın 23-də Sumqayıt Dövlət Universitetində (SDU) Azərbaycan ədəbiyyatının görkəmli nümayəndəsi, Xalq şairi Bəxtiyar Vahabzadənin anadan olmasının 100 illik yubileyinə həsr olunmuş “Sözün Bəxtiyarı” adlı tədbir keçirilib.

Tədbirdən əvvəl iştirakçılar universitetin Böyük Akt zalının foyesində təşkil edilən kitab sərgisi ilə tanış olublar. Sərgidə şairin müəllifi olduğu kitablar, seçilmiş əsərləri və onun yaradıcılığına dair ədəbiyyat nümunələri nümayiş etdirilib.

Daha sonra Prezident İlham Əliyevin Bəxtiyar Vahabzadənin 100 illik yubileyinin qeyd edilməsi ilə bağlı imzaladığı Sərəncam səsləndirilib. Tədbir çərçivəsində şairin həyat və yaradıcılıq yolunu, eləcə də Ulu Öndər Heydər Əliyevlə görüşlərini əks etdirən videoçarx nümayiş olunub.

Universitetin rektoru v.i.e., AMEA-nın müxbir üzvü, professor Əminağa Sadıqov çıxış edərək iştirakçıları salamlayıb və Bəxtiyar Vahabzadənin Azərbaycan ədəbiyyatında və milli düşüncənin formalaşmasında mühüm rolu olduğunu vurğulayıb. O, Prezident İlham Əliyevin şairin yubileyinin dövlət səviyyəsində qeyd olunmasına dair Sərəncamının ədəbiyyata və ziyalılara göstərilən qayğının bariz nümunəsi olduğunu qeyd edib.

Rektor çıxışında “Ana”, “Vətən marşı”, “Bayraq”, “Ana dili” kimi şeirlərin dərin təsir gücündən danışaraq, “Gülüstan” poemasının milli şüurun oyanışında əhəmiyyətli rol oynadığını bildirib. O, həmçinin gəncləri Azərbaycan ədəbiyyatının klassiklərini, xüsusilə Bəxtiyar Vahabzadənin yaradıcılığını dərindən öyrənməyə çağırıb.

Tədbirdə Milli Məclisin deputatı Elnarə Akimova, “Ədəbiyyat” qəzetinin baş redaktoru, filologiya üzrə fəlsəfə doktoru Azər Turan və SDU-nun dosenti İlahə Vəliyeva çıxış edərək şairin zəngin irsindən, milli azadlıq ideyalarının poeziyasında xüsusi yer tutmasından danışıblar.

Bədii hissədə universitetin tələbələri Bəxtiyar Vahabzadənin poeziyasından nümunələr səsləndirib, onun sözlərinə bəstələnmiş mahnılar ifa olunub. İstedadlı müğənni Hicran Əhmədovanın çıxışı tədbir iştirakçıları tərəfindən alqışlarla qarşılanıb.