Bu gün, oktyabrın 24-də Cəbinin – Vətən müharibəsində qəhrəmanlıq səlnaməsi yazan igidimiz, Xüsusi Təyinatlı Qüvvələrin (XTQ) baş giziri Sübhan Cəbrayılovun torpağa əmanət edildiyi gündür.
Sübhan şanlı Vətən Müharibəsi günlərində göstərdiyi şücaətlərə görə ölümündən sonra “Vətən Müharibəsi Qəhrəmanı” adına və “Vətən uğrunda” medalına layiq görülüb.
Füzuli, Hadrut, Cəbrayıl və Zəngilanın tam alınmasında iştirak edib. Qubadlıda 2 kənd alındıqdan sonra şəhidlik zirvəsinə ucalıb.
Sübhan Cəbrayılov Salyanın Marışlı kəndindəndir. Orta məktəbi orada bitirib, oradan hərbiyə yollanıb və yolunu Xüsüsi Təyinatlı Qüvələrdən salıb.
Vətən Müharibəsi Qəhrəmanının anası Ləzifə Cəbrayılova deyir ki, vətən torpaqları uğurunda oğlunu itirib, əvəzində çoxlu oğullar qazanıb:
-Ali Baş Komandan İlham Əliyev hər çıxışında torpaqlarımızın şəhidlərin qanı-canı bahasına alındığını xüsusi vurğulayır. Övladlarımız torpaqlarımızın azadlığı uğrunda döyüşdülər, düşməni döyüş meydanında canları bahasına məğlub etdilər. Cənab prezident bu haqda hər çıxışında deyir, onun o sözləri bizim sağalmaz yaralarımıza məlhəm olur. Bizlər övladlarımızın adının yaşadılması ilə yaşayırıq.
Sübhan mənim sonbeşiyim idi. Uşaqlıqdan boksla, əlbəyaxa döyüşlə məşğul olurdu. Hərbi xidmətdə olarkən boyuna, bədəninə, fiziki qüvvəsinə görə onu XTQ-yə seçmişdilər. Xüsusi təyinatlılarda kəşfiyyatçı kimi xidməti 20 il idi. Həmişə hara getdiyini soruşanda deyirdi, təlimə gedirəm. Heç vaxt işi haqqında danışmazdı. Sonuncu dəfə oğlumla 2020-ci il sentyabrın 25-i görüntülü danışdım. Dedi, təlimə gedəcəyəm, mən də ona sağ-salamat geri dönməsini arzuladım. Daha bilmədim ki, bu təlim, o təlimdən olmayacaq. Balamız, geri dönməyəcək, qəhrəmancasına vuruşacaq və qəhrəmancasına şəhid olacaq. 

Şəhid anası deyir ki, oktyabrın 23-ü, Sübhanın ad günündə bayrağa bükülmüş tabutu evinə gətirilib:
- Onu ailəsinin yaşadığı, 2 övladının böyüdüyü Sumqayıt şəhərində, oradakı Şəhidlər Xiyabanında dəfn etmək qərarı verdik. Oktyabrın 24-də orada torpağa tapşırıldı. Sübhana ölümündən sonra “Vətən Müharibəsi Qəhrəmanı” adı verildi və “Vətən uğrunda” medalı ilə təltif olundu. Həmişə zarafatla deyirdi ki, ay ana, siz məni 18 il saxlamısız, dövlət 20 ildir saxlayır. Bizim işimiz düşməndən torpaqlarımızı geri almaqdır. Şükür bu günə ki, Sübhanın, onun üzvü olduğu XTQ-nin Əfsanəvi Taborun uşaqlarının əziyyəti, qanı yerdə qalmadı. Bu, bizə təsəllidir. Sübhan döyüşlərdə əsl qəhrəmanlıq nümunələri göstərib. Döyüş yoldaşları deyir ki, subaylara deyirmiş ki, siz arxadan gəlin, biz evliyik, uşaqlarımız var. Amma siz subaysınız, sizin geridə qoyduğunuz yoxdur. Mərd idi. Neçə yaralı döyüş yoldaşını xilas edib, yaralarını sarıyıb. Onlar bizə gəlib təşəkkür edirlər. O, döyüşdə erməni polkovnikini əsir götürüb, düşmənin “Ural” dolusu canlı qüvvəsini məhv edib. Düşmənin diversiya qrupunu erməni dilində aldadaraq pusquya salmışdı. Heç bir yaralını, şəhidi döyüş gedən ərazidə qoymur, çiynində daşıyaraq oradan çıxarırdı. Düşmənin içinə ilk girənlər Sübhangil olurdular, daha sonra XTQ-nin quru qoşunları gəlirdi. Qubadlıda sonuncu döyüşündə 12 nəfər olublar. Həmin ərazidə erməni çox olub və mühasirəyə düşüblər. Güllələri bitib, əlbəyaxa döyüşə keçiblər. Neçə ermənini öldürüb. Birini boğub, birini xəncərlə vurub. Bütün bunları döyüş yoldaşları görüblər. Danışırdılar ki, ermənilərin üstünə hücum edib, onları boğurmuş. Ermənilər görüblər ki, bacarmırlar, boynundan snayperlə vurublar… 

Sübhan Cəbrayılov Vətən müharibəsindən əvvəl, Lələtəpənin alınması zamanı da qəhrəmanlıq göstərib. O zaman da Prezident tərəfindən təltif olunub, mükafatlandırılıb:
-Onun ürəyi Qarabağla döyünürdü. 18 il əziyyət çəkdi, bütün günü təlimlərə qatılırdı, demək olar ki, evdə olmurdu. Döyüş yoldaşları ona Cəbi deyib çağırırdılar. O, həmişə Qarabağ üçün, torpaqlarımızın azadlığı üçün hazırlaşırdı. Deyirdi, oranı alaq ki, bizdən sonrakı nəsil rahat yaşasın. Sübhanın arzusu torpaqlarımızı işğaldan azad görmək idi. O, canı bahasına bu arzusuna çatdı. 

Şəhid anasının Gənclər və İdman Nazirliyindən, Sumqayıt İcra Hakimiyyətindən gözlələntiləri var. Deyir ki, Sübhan Cəbrayılovun adının yaşadılması, əbədiləşdirilməsini istəyir:
- Sağ olsun Salyan boks məktəbinin rəhbərliyi. Sübhanın adına 3 rayonun boks yığmalarından ibarət turnir təşkil etdilər. Belə bir turnirin respublika səviyyəsində də keçirilməsi bizə təsəlli olardı. Dostları bu məqsədlə Gənclər və İdman Nazirliyinə müraciət ünvanlayıblar. Ümid edirik ki, Sumqayıtda da, oğlumun yadigarlarının yaşadığı, özünün uyuduğu şəhərin bir küçəsinə onun adını verməklə adını əbədiləşdirəcəklər.
 Musavat.com