“2023-2027-ci illər üzrə ixtioz və bullyoz epidermoliz xəstəliklərinin müalicəsi və profilaktikasına dair Tədbirlər Proqramı” çərçivəsində TƏBİB-in təşkilatçılığı ilə Sumqayıt Tibb Mərkəzində ixtisaslaşdırılmış təlim təşkil olunub.

Təlimin əsas məqsədi Proqramın icrası barədə məlumatların çatdırılması, nadir dəri xəstəlikləri ilə yaşayan xəstələrin əlillik və evdə təhsil imkanlarının müzakirəsi, həmçinin müayinə və müalicədə istifadə olunan dərman preparatları, sarğı materialları və baxım vasitələrinin düzgün tətbiqi ilə bağlı maarifləndirmə olub.

Təlimdə TƏBİB-in dəstəyi ilə Respublika Dəri Zöhrəvi Mərkəzinin və Bakı Baş Səhiyyə Mərkəzinin 1 nömrəli Uşaq Dəri Zöhrəvi Dispanserinin baş həkimləri və dermatoloqları təlimçi qismində iştirak ediblər.

Tədbir iki mərhələdə keçirilib: ilk mərhələdə ailə həkimləri xəstəliklər və diaqnostik xüsusiyyətlər barədə məlumatlandırılıb; ikinci mərhələdə isə dermatoloqlar üçün praktiki sessiyalar təşkil olunub, burada müalicə və profilaktika metodları, dərman və sarğı vasitələrinin tətbiqi əyani şəkildə göstərilib.

Təlimdə ümumilikdə 30-a yaxın səhiyyə əməkdaşı iştirak edib.

Bu təlim həm bilik mübadiləsi, həm də praktiki bacarıqların artırılması baxımından böyük əhəmiyyət kəsb edib və nadir dəri xəstəlikləri ilə mübarizədə mütəxəssislərin peşəkarlığını artırmağa xidmət edib.