Beynəlxalq Valyuta Fondu (IMF) 2025-ci il üzrə açıqladığı son hesabatda bildirib ki, Qazaxıstanın adambaşına düşən nominal ÜDM-i 14 770 ABŞ dolları, Rusiyanın isə 14 260 ABŞ dolları təşkil edib.
Sumqayit.tv Qazaxıstan KİV-nə istinadən xəbər verir ki, bu göstərici Qazaxıstanın tarixində ilk dəfə qonşu ölkəni geridə qoyması kimi qiymətləndirilir.

Mütəxəssislərin fikrincə, Qazaxıstanın iqtisadi uğurunun əsas səbəbləri pandemiyadan sonra sürətli bərpa prosesi, enerji resurslarının səmərəli istifadəsi, xarici sərmayələrin cəlbi və ardıcıl iqtisadi islahatlarla bağlıdır. Digər tərəfdən, Rusiyaya qarşı tətbiq edilən beynəlxalq sanksiyalar onun iqtisadi artım tempinə mənfi təsir göstərib.

Analitiklər hesab edirlər ki, bu dəyişiklik Mərkəzi Asiya regionunun iqtisadi güc balansında mühüm dönüş yaratmaqla yanaşı, Qazaxıstanın beynəlxalq arenada nüfuzunu artıracaq.