Azərbaycanda az miqdarda narkotikə görə cinayət məsuliyyəti ləğv edilir.

“Report”un xəbərinə görə, bu, Milli Məclisin bu gün keçirilən iclasında III oxunuşda müzakirəyə çıxarılan Cinayət və İnzibati Xətalar məcəllələrinə təklif olunan dəyişikliklərdə əksini tapıb.
Belə ki, qanunsuz olaraq narkotik vasitələrin, psixotrop maddələrin satış məqsədi olmadan hazırlanmasına, əldə edilməsinə, saxlanılmasına, daşınmasına və ya göndərilməsinə görə hansı hallarda cərimə, hansı hallarda azadlıqdan məhrumetmə cəzaları tətbiq olunacağı yenidən müəyyənləşir.
Hazırda qüvvədə olan Cinayət Məcəlləsinə əsasən, satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma bir ildən üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır. İnzibati Xətalar Məcəlləsinə əsasən isə, qanunsuz olaraq narkotik vasitələrin, psixotrop maddələrin istehlakına, satış məqsədi olmadan şəxsi istehlak miqdarında hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə edilir, işin hallarına görə və xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə iki ayadək müddətə inzibati həbs tətbiq edilir.
Cinayət Məcəlləsinə təklif olunan dəyişikliklə isə satış məqsədi olmadan qanunsuz olaraq narkotik vasitələri və ya psixotrop maddələri xeyli miqdarda əldə etmə, saxlama, hazırlama, emal etmə, daşıma bir ildən üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılacaq. Həmin əməllər külli miqdarda törədildikdə üç ildən səkkiz ilədək müddətə azadlıqdan məhrum etmə ilə cəzalandırılacaq. Bu əməllər xüsusilə külli miqdarda törədildikdə səkkiz ildən on beş ilədək müddətə azadlıqdan məhrum etmə ilə cəzalandırılacaq.
Qanunsuz olaraq narkotik vasitələrin, psixotrop maddələrin istehlakına, satış məqsədi olmadan az miqdarda hazırlanmasına görə isə inzibati məsuliyyət müəyyənləşir. Beləliklə, İnzibati Xətalar Məcəlləsinə təklif olunan dəyişikliyə görə, qanunsuz olaraq narkotik vasitələrin, psixotrop maddələrin istehlakına, satış məqsədi olmadan az miqdarda hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə edilir, işin hallarına görə və xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə iki ayadək müddətə inzibati həbs tətbiq ediləcək.
Dəyişiklik layihəsi səsverməyə çıxarılaraq III oxunuşda qəbul edilib.

Məsələ ilə bağlı Sumqayit.tv-yə açıqlama verən Regional Sosial Təşəbbüslərə Dəstək İctimai Birliyinin sədri, narkomaniya üzrə ekspert Emil Maqalov bunları deyib: "Narkotik və narkotik istifadəçilərinin qarşısını almaq üçün hələ ki, bu qərarı məqsədəuyğun saymıran. Niyə ? Məsələ burasındadır ki, narkotiki yayanlar məhz narkomanların özləridir. Demək olar 70 faiz narkoman potensial narkotik satandı. Həmin vaxtı onların 80 faizi cinayətkara çevrilir. Dəmir, kondisioner, sayğac və s oğurlayır. Deyək ki şərti olaraq 100 manat əldə edir.  Həmin 100 manatla şərti olaraq 2 qram narkotika alır. 1 qram narkotiki 10 yerə bölüb satırlar. Deyək ki, o kiçik hissələri 10 manata satır. Beləliklə, həm özü üçün saxlayır, həm də sabah narkotik almaq üçün pul qazanır.  Getdikcə bu narkomanlar xəstəlik yayır. Çünki bir müddətdən sonra bu narkomanlar iynəyə keçir.  Narkomanlara 1 qramlıq insulin iynəsi satılmır . "Narkomansan, bizə problem yaratma" deyib, onları aptekdən çölə çıxarırlar. Nəticədə onlar bir-birinin iynəsini istifadə edir. Qiçs, Hepatit kimi xəstəliklər yayılır. Bu adamları həm cinayətkar, həm narkotiksatan, həm də xəstəlik yayan adam kimi qəbul edib müalicə etmək lazımdı. Azərbaycanda cəmi 7 müalicə dispanseri var. Azı 50 dispanserə ehtiyac var. Mən demirəm hamısını müalicə edək. Müəyyən şərtlərlə bəzilərini müalicə edib, bunların 10 faizini cəmiyyətə qaytarmaq olar. Hesab edirəm ki, bu qərarı qəbul etməmişdən öncə, sadaladığım məsələlərə baxılmalı, daha sonra qanun qəbul etməyi tövsiyə edirəm".