Sumqayıt-Bakı sürətli elektrik qatarının hərəkət cədvəli valideynlərin narazılığına səbəb olub.

Bununla bağlı Oxu.Az-a şikayət daxil olub.

Qeyd olunub ki, saat 12:00-dan 15:00-a qədər Sumqayıtdan Bakıya heç bir reys yoxdur.

"Bu isə xüsusilə tələbələr üçün ciddi problem yaradır. Onlar dərslərini təxminən saat 13:00-da bitirsələr də, evə dönmək üçün növbəti qatarı gözləməyə məcbur qalırlar. Məsələ ilə bağlı müvafiq quruma dəfələrlə müraciət etsək də, "qeydə alındı" cavabından başqa heç bir nəticə yoxdur", - deyə şikayətdə vurğulanır.

Qatarların hərəkət cədvəlinin tələbələrin dərs saatlarına uyğun şəkildə yenidən tənzimlənməsini istəyən valideynlər bildirirlər ki, bu iki saatlıq fasilə uşaqların təhlükəsizliyi və vaxt itkisi baxımından onları narahat edir.

Məsələ ilə bağlı "Azərbaycan Dəmir Yolları" QSC-nin şöbə müdiri Bəxtiyar Hacıyev Oxu.Az-a açıqlamasında bildirib ki, sentyabrın 15-dən etibarən Abşeron dairəvi dəmir yolu marşrutu üzrə qatarların hərəkət cədvəli optimallaşdırılıb, reyslərin sayı artırılıb.

"Bu tarixə qədər iş günləri və ya həftəiçi reyslərin sayı 66-dan 92-yə çatdırılmışdısa, hazırda həftəiçi reyslərin sayı 103-dür. Qrafikin optimallaşdırılması xüsusilə pik saatlarda sərnişinlərin rahat və vaxtında mənzil başına çatmasını təmin etmək məqsədi daşıyır. Bütün bu dəyişikliklər nəticəsində Abşeron dairəvi dəmiryol marşrutunda günlük sərnişindaşıma sayı 37 mindən 42 600-ə qədər artıb.

Nəzərə alınmalıdır ki, reyslər təyin edilərkən həm mövcud qatar sayı, həm infrastruktura və qatarlara davamlı baxış və zəruri hallarda təmir işləri, həm də yük qatarlarının hərəkəti nəzərə alınır", - deyə B.Hacıyev bildirib.