Onun sözlərinə görə, həmin nöqtələrdən biri də məhz Qarabağdır: "Qarabağda baş verən hadisələrin fonunda bu iki dövlət Ermənistanı özlərinin nüfuz dairəsində saxlamağa çalışırlar. Bildiyimiz kimi, Ermənistan iki əsrdi Rusiyanın təsiri altında öz varlığını sürdürüb. İndi isə vəziyyət dəyişib. Hadisələr heç də Moskvanın istədiyi kimi getmir. Artıq, Qərb Paşinyanı iqtidara gətirməklə Ermənistanın siyasi hakimiyyətini öz nəzarəti altına almağı bacarıb. Amma Rusiyanın Ermənistan üzərindəki təsirini tam olaraq neytrallaşdıra bilməyib. Bu da o deməkdir ki, Kremlin İrəvan üzərindəki nəzarət mexanizmi var olduqca Moskva Qafqazdakı varlığını qoruyub saxlamış olacaq. Məhz elə ona görə də 2020-ci il 10 noyabr bəyənnaməsindən sonra Rusiya sülhməramlı adı altında hərbi kontengentini Qarabağa yerləşdirdi. Və təəssüflər olsun ki, 2 ilə yaxın zaman keçməsinə baxmayaraq nə Rusiya, nə də Ermənistan bəyannamənin bəndlərinin demək olar heç birinə əməl etmədi. Ermənilər onsuz da böyük güclərin maşası olduğundan istəsələr belə sülhə gedən yolda işıq yandıra bilməzlər. Ona görə də təlimata uyğun olaraq nə öz silahlı qruplaşmalarını Qarabağdan çıxarırlar, nə də sakit durmurlar. Moskvanın isə öz üzərinə götürdüyü öhdəliyə əməl etməməsi onunla bağlıdır ki, bəyənnamədə qeyd olunan bəndlər yerinə yetirildiyi andan, Rusiyanın vasitəçiliyi və missiyası Qarabağda da bitmiş sayılacaq. Ondan sonra isə Kreml öz hərbi qüvvələrini Qarabağdan geri çəkmək məcburiyyətində qalacaq. Beləliklə, İrəvanın Moskvadan asılılığı bir az da azalmış olacq. Rus ordusunun Qarabağı tərk etməsi isə Kremlə heç cür sərf etmir. Amma ortada bir həqiqət var. Bu da ondan ibarətdir ki, Azərbaycanın ayrılmaz ərazisi olan Qarabağın talehi yalnız Rusiya, Ermənistan, yaxud da ABŞ-ın istəyinə uyğun həll edilə bilməz. Əvvəl-axır Azərbaycan öz iradəsini göstərməlidir. Necə ki, 2020-ci il 27 sentyabrda iradəsini ortaya qoydu və ərazilərimizin böyük hissəsini işğaldan azad etdi. Son hadisələr bir daha göstərdi ki, Azərbaycan artıq nə Rusiyanın, nə də Qərb dövlətlərin Qarabağ konfliktinin həll edəcəyinə inanmır. Ona görə də öz göbəyini özü kəsməkdə qərarlıdır. Əgər ölkə Prezidenti İlham Əliyevin son açıqlamalarına diqqət etsək, görərik ki, ölkə başçısı 10 noyabr bəyanatına imza atan Rusiya və Ermənistanın davranışlarından məmnun deyil. Ona görə də açıqca bəyan etdi ki, “separatçı silahlıları Qarabağdan ya çıxardın, ya da açıqca deyin biz özümüz tədbir görək”. Məhz elə Laçın və Kəlbəcər xəttində baş verən təxribata qarşı Azərbaycan ordusunun "Qisas" əməliyyatı həm 10 noyabr bəyanatına imza atan ölkələrə, həm də Ermənistanı müdafiə edən Qərb dövlətlərinə ciddi bir siqnal oldu deyə düşünürəm".