AFFA Sumqayıt şəhərində azyaşlı futbolsevərlərin xəyallarını gerçəkləşdirib. Bir müddət əvvəl H.Z. Tağıyev qəsəbəsində yaşayan uşaqlar sosial şəbəkələr vasitəsilə müraciət edərək futbol oynamaq üçün şəraitin yaradılmasını xahiş etmişdilər.

Sumqayit.tv xəbər verir ki, Assosiasiya həmin müraciətə biganə qalmayıb və qəsəbədə uşaqlar üçün futbol şəraitini yaxşılaşdırıb. Bu məqsədlə əraziyə minifutbol qapıları quraşdırılıb, həmçinin balaca oyunçulara formalar, jiletlər, futbol topları və digər idman ləvazimatları təqdim olunub.

Tədbirdə AFFA-nın Kütləvi Futbol Departamentinin rəhbəri Fərrux İsmayılov da iştirak edib. O, uşaqlarla görüşərək onlara uğurlar arzulayıb və bildirib ki, futbolun kütləviliyinin artırılması, uşaqların sağlam həyat tərzinə yönləndirilməsi Assosiasiyanın əsas hədəflərindəndir.

AFFA-nın nümayəndəsi həmçinin vurğulayıb ki, bu kimi layihələr davamlı olacaq və ölkənin müxtəlif bölgələrində uşaqlar üçün yeni imkanlar yaradılacaq.