"Zavallı" Azərbaycan vətəndaşı
Ölkəmizin bir qismi yanır, flora və faunamız ciddi mənada zərər görür. Bu yanğını da Fövqəladə Hallar Nazirliyi ( FHN ) işçiləri ilə yanaşı, mülki vətəndaşlar da söndürməyə çalışır. Ölkədə günü-gündən bahalaşma müşahidə olunur. Çörəyin, ətin, yağın və digər ərzaq məhsullarının qiymətləri hər gün qalxır. Qazilərimiz özlərini yandırır və sülh bəyannaməsi imzalandığı təqdirdə, biz nəyə görə Şəhid veririk. Lakin bunların heç biri gündəmdə deyil. Amma və lakin FHN-də baş verən məlum biabırçı görüntülər bu günə kimi müzakirə olunur və sosial şəbəkələrdə hələ də paylaşılır. FHN adı gələndə insanlarımızın simasında ironik tendensiya müşahidə olunur. Hansı ki, o qurumda yüzlərlə işçilər var ki, geyindikləri formanın dəyərini layiqincə verir. Hətta, Azərbaycanımızın adını həmin formanı geyinənlər ucalara qaldırırlar. Örnək kimi ötən il qardaş Türkiyədə meşə yanğını zamanı bizim FHN işçilərinin göstərdikləri fədakarlığı nümunə göstərmək olar. Ancaq nədənsə bu cür halları unudaraq, hansısa əxlaqsızların etdiklərini əldə bayraq kimi tutmaqla hər kəsi "eyni qaba" qoyaraq tənqid edirik. Daha qlobal və vacib məsələləri isə görməzdən gəlirik. Əminəm ki, günü gündən bahalaşmanın nəticəsi nəyin ki Qazilərimizin, eyni zamanda, sıravi vətəndaşlar arasinda da intihar sayını artıracaq.
Hörmətli həmvətənlərim, evinizə çörək apara bilməməyinizin sizi necə də ruhən sındırdığını bilirəm, övladınızın ürəyi nə istəsə onu almaqda çətinlik çəkdiyinizi də anlayıram. Amma bu da bir həqiqətdir ki, intihar çıxış yolu deyil. Özünüzə qəsd edərək heç nə əldə etməyəcəksiz və sizin ölümünüzdən sonra da həyat davam edəcək. Allahın sizə verdiyi cana sahib çıxın, bu dünya bunu haqq etmir.
Azərbaycan təbiətinin zənginliyi ilə milyonlarla insanların qəlbində taxt qurub və ölkəmizdə kifayət qədər taxıl var. Bu təqdirdə çörəyin qiymətinin bahalaşma səbəbi nədir? Dövlət Statistika Komitəsinin yaydığı məlumata görə, ölkəmizdə orta maaş 14,2 faiz artaraq 824,7 manat olub. Hörmətli DSK maraqlıdır əcəba hansı orta statistik bir vətəndaş bu qədər maaş alır?! Ümumiyyətlə, ölkəmizdə nə qədər şirkət və zavodların adını çəkə bilərik ki, onlar öz işçilərinə 824 manat əmək haqqı verir?
Kağız üzərində olan yazı başqa reallıq bir başqadir. Reallıqla üzləşsək görəcəyik ki, ölkəmiz də orta əmakhaqqi 300 manatı keçmir. Bu da o deməkdir ki, ölkəmizdə orta əməkhaqqı adı ilə işləyənlərin əksəriyyəti minimum əməkhaqqı alır. Yəni 300 manat. Belə olan təqdirdə ölkəmizdə çörəyin və digər ərzaqların qiyməti günü-gündən artırsa bu xalq necə dolanacaq? Çoxuşaqlı ailələr necə yaşasın?
Ölkəmizdə 5-dən çox uşağı olan ailələrin sayı 2500-ə yaxındır. Gün ərzin də 3-4 ədəd (600 qr) 0,65 qəpiklik çörək alınsa ayda edir 80 manat 06 qəpik edir. Bir vətəndaşın aldığı ortalama əməkhaqqı isə 300 manat olduqda, ondan da 80 manat (yalnız çörək pulu) çıxılsa, geridə qalır 220 manat. Hələ toy, yas, geyim və sağlamlıq xərcləri və digərlərini demirəm.
Bir tərəfdə çox cüzi maaşlar və təqaüdlər qaldırılır. Digər yandan da dərhal ərzaqların qiymətlərini qaldırırsız və beləliklə, nəticədə heç bir dəyişiklik olmur.
İndi özünüz deyin, 11 iqlimin 9-u ilə əhatə olunan, yeraltı və yerüstü sərvətləri ilə dünyaya meydan oxuyan, zəngin hesab olunan bir ölkədə xalqın "varlıq içində, yoxluq çəkmələri" ürəkağrıdan deyilmi!?
Vəsiqə Dadaşova
22-08-2022, 11:35
326
