Plenar iclasda çıxış edən deputat Hacı Zeynalabdin qəsəbəsi və şəhərdəki kitabxana və musiqi məktəblərinin vəziyyətini müzakirə etdi.

Sumqayit.tv xəbər verir ki, Milli Məclisin plenar iclasında çıxış edən deputat Elnarə Akimova 2026-cı ilin dövlət büdcəsi zərfini yüksək qiymətləndirib və büdcənin mərkəzində insan amilinin dayandığını vurğulayıb.

Deputat çıxışında Sumqayıt şəhərinə də toxunaraq bəzi mədəniyyət ocaqlarının acınacaqlı vəziyyətdə olduğunu bildirib. O, şəhərdəki kitabxanaların və musiqi məktəblərinin təmirə ehtiyacı olduğunu, Cəfər Cabbarlı adına Mədəniyyət Evində isə qəzalı vəziyyətin yarandığını qeyd edib.

Elnarə Akimova xüsusilə Hacı Zeynalabdin qəsəbəsinə diqqət çəkib. Deputat qeyd edib ki, burada 40 mindən çox əhali yaşamasına baxmayaraq, bir dənə də mədəniyyət ocağı yoxdur. Onun sözlərinə görə, mədəniyyət evləri və kitabxanalar yalnız mədəni-kütləvi tədbirlər üçün deyil, həm də gənclərin maariflənməsi və ziyanlı vərdişlərdən uzaq tutulması baxımından böyük əhəmiyyət daşıyır.

Deputat aidiyyəti qurumları bu istiqamətdə tədbirlər görməyə, təmirə ehtiyacı olan məkanları nəzarətə götürməyə və ehtiyac olan ərazilərdə yeni mədəniyyət ocaqları açmağa çağırıb.

Elnarə Akimova çıxışında həmçinin Milli Kitab Mükafatı ilə bağlı təklifini səsləndirərək kitab siyasətinə diqqətin artırılmasının vacibliyini vurğulayıb. Deputat bildirib ki, kitablar milli kimliyi və milli yaddaşı qoruyur və yaddaşlı nəsil yetişdirmək üçün bu sahəyə sərmayə qoymaq vacibdir.

Sonda deputat büdcə zərfini yüksək qiymətləndirərək, Prezident İlham Əliyevin rəhbərliyi ilə Azərbaycanın yeni inkişaf mərhələsində daha böyük uğurların qazanılacağına əminliyini ifadə edib.

20-11-2025, 18:59 116