Sumqayıt sakininin adı keçən “Beniz” işi üzrə məhkəmə davam edir.
Sumqayit.tv xəbər verir ki, hədə-qorxu ilə tələb etmədə təqsirləndirilən tanınmış tiktoker Aybəniz Xəlilovanın (“Beniz”) cinayət işi üzrə növbəti məhkəmə prosesi Bakı Ağır Cinayətlər Məhkəməsində keçirilib.
Məlumata görə, prosesə hakim Fəxri Məmmədov sədrlik edib. Tiktoker prokuror Tural Yaqubovun cinayət işində əks olunan bir neçə epizodla bağlı suallarını cavablandırıb.
Aybəniz Xəlilova xüsusilə Sumqayıt sakini Xalid Kərimovu şantaj etməsi iddialarına münasibət bildirib. O deyib ki, X.Kərimovla bir müddət ailə kimi yaşadıqları üçün onu şantaj etməsi mümkün deyil:
“Sumqayıtda evimi satıb, onun köməkliyi ilə Bakıda ev almışıq. Avtomobilimi də satmışam, Xalid üstünə pul qoyub yenisini almışıq. Mənim pula ehtiyacım olmayıb. Bir il ərzində TikTok-dan 306 min manat qazanmışam”.
O, xaricdə yaşayan bloqer Manaf Cəlilzadə ilə əlaqəsi olması iddialarını da təkzib edib və həmin şəxsin canlı yayımlar zamanı ona hədə dolu mesajlar yazdığını bildirib.
Məhkəmə vaxt məhdudiyyəti səbəbindən təqsirləndirilən şəxsin digər epizodlarla bağlı ifadələrinin 9 dekabrda keçiriləcək növbəti iclasda davam etdiriləcəyini açıqlayıb.
Qeyd edək ki, Sumqayıt sakini Xalid Kərimov polisə müraciət edərək tiktokerin ondan hissə-hissə olmaqla ümumilikdə 836 min manat tələb etdiyini iddia edib. Aybəniz Xəlilovaya Cinayət Məcəlləsinin 182.3.2-ci (külli miqdarda pul tələb etmək) maddəsi ilə ittiham irəli sürülüb.
18-11-2025, 20:48
77
