Redaksiyamızın Sumqayıtdakı dövlət qurumlarına ünvanladığı sosial media rəyləri ilə bağlı sorğuya cavab daxil oldu.

Sumqayit.tv tərəfindən dövlət qurumlarına sosial şəbəkələrdə səslənən rəy və qeydlərin monitorinqi, vətəndaş müraciətlərinə baxılması və qəbul mexanizmləri ilə bağlı ünvanlanan rəsmi sorğuya ilk cavab daxil olub. Sorğuya növbəti cavab verən qurum Suçqayıt şəhər Bələdiyyəsi oldu. Qurumun mətbuat xidmətinin rəhbəri Nizami Rəsulovun rəsmi münasibətini, olduğu kimi, dəyişiklik edilmədən oxucuların diqqətinə çatdırırıq:

“Sumqayıt TV” redaksiyasının sosial şəbəkələrdə sakinlərin rəy və müraciətləri ilə bağlı ünvanladığı sorğuya cavab olaraq bildiririk ki, Sumqayıt Bələdiyyəsi vətəndaşların müraciətlərinin operativ araşdırılması və vaxtında cavablandırılması üçün mütəmadi olaraq fəaliyyət göstərir.

1. Sosial şəbəkələrdə yazılan şərhlərin monitorinqi aparılır
   Bələdiyyənin mətbuat xidməti sosial şəbəkə platformalarında rəsmi paylaşımlar altında yazılan rəy və şikayət xarakterli qeydləri daimi şəkildə izləyir. Qaldırılan məsələlər operativ şəkildə araşdırılır və müvafiq struktur bölmələrinə yönləndirilir.

2. Şərhlər əsasında müraciətlərə baxılması mexanizmi mövcuddur
   Sosial şəbəkə istifadəçilərinin yazdığı narazılıq və ya təklif xarakterli qeydlər rəsmi müraciət kimi qeydə alınır və araşdırılması üçün aidiyyəti şöbələrə təqdim olunur. Hər bir müraciət üzrə nəticə vətəndaşa geri bildirilir.

3. Qəbula düşmək və müraciətlərin cavablandırılmasında çətinliklərlə bağlı narazılıqlara münasibət
   Sumqayıt Bələdiyyəsi sakinlərin qəbula yazılmaq və müraciət prosesində qarşılaşdığı hər bir çətinliyi diqqətlə təhlil edir. Qeyd olunan halların aradan qaldırılması üçün mövcud prosedurlar təkmilləşdirilir və vətəndaş məmnunluğunun artırılması əsas prioritetlərdən biri kimi müəyyən olunub.

4. Rəsmi qəbul cədvəli

• Qəbula qeydiyyat: Hər həftənin II günü, saat 14:00–17:00

• Rəsmi qəbul: Hər həftənin IV günü

• Sədr müavinlərinin qəbul günləri: Hər gün təşkil olunur və müraciətlər yerində araşdırılır

Təxirəsalınmaz məsələlər operativ şəkildə həll edilir, icra vaxtı tələb edən müraciətlər isə qeydiyyata alınaraq nəzarətdə saxlanılır.

Sumqayıt Bələdiyyəsi olaraq bildiririk ki, vətəndaşların hər bir müraciəti bizim üçün önəmlidir və şəffaf, əlçatan, operativ xidmət göstərilməsi istiqamətində fəaliyyətimizi davam etdiririk.

Redaksiya qeydi: Digər qurumların sorğuya cavab verəcəyi bildirilsə də, hələlik rəsmi mövqe göndərməyiblər.

20-11-2025, 11:16 223