“Azərsu” Açıq Səhmdar Cəmiyyəti istehlakçıların su təminatının yaxşılaşdırılması, keyfiyyətli və dayanıqlı içməli su ilə təmin edilməsi  istiqamətində kompleks tədbirlər həyata keçirir.  Bakı şəhəri və Abşeron yarımadasında, həmçinin regionlarda yerləşən mərkəzi və məhəllədaxili su anbarlarının yuyulması işləri qrafikə uyğun davam etdirilir. 

Təsdiqlənmiş təlimata uyğun  olaraq “Azərsu” ASC-nin balansında olan su anbarları ildə ən azı bir dəfə yuyulur və dezinfeksiya edilir. Bu məqsədlə anbarlar tamamilə boşaldılır və onların dib hissəsi lil çöküntülərindən təmizlənir. Daha sonra anbarların istismara yararlı olub-olmaması  mütəxəssislər tərəfindən ciddi şəkildə yoxlanılır, təhlükə doğura biləcək yerlər müəyyənləşdirilərək bərpa işləri aparılır. Dezinfeksiya işləri aparıldıqdan sonra suyun keyfiyyətinə dövlət nəzarətini həyata keçirən Gigiyena və Epidemilogiya Mərkəzinin təqdim etdiyi arayışlar əsasında anbarlar yenidən istismara buraxılır. İstismar dövründə hər gün anbarlardan su nümunələri götürülərək Mərkəzi Laboratoriyada analiz olunur.
          Bu sahədə işlər hazırda da intensiv qaydada davam etdirilir. 2022-ci ilin yanvar-aprel aylarında  ümumi  həcmi 490 min kubmetr olan 305 mərkəzi və məhəllədaxili anbar yuyularaq təmizlənib və dezinfeksiya edilib. Ümumilikdə, 2022-ci ildə Bakı şəhəri və Abşeron yarımadasında, həmçinin regionlarda  ümumi həcmi 1 milyon kubmetrdən çox olan  870 anbarın yuyulub təmizlənməsi nəzərdə tutulur.